ახალი ამბები

რუსეთის პირდაპირი ინვესტიციების ფონდის პრეზიდენტი და პუტინთან დაახლოებული კირილ დმიტრიევი შეხვედრებს მართავს ტრამპის გუნდის წევრებთან - ეს უკრაინაში სრულმასშტაბიანი შეჭრის შემდეგ რუსი ჩინოვნიკის პირველი ოფიციალური ვიზიტია ვაშინგტონში. 

State Of Play: დმიტრიევის ვაშინგტონში დაგეგმილი ვიზიტის შესახებ ამერიკული მედია გასულ დღეებში წერდა, ვიზიტი ცოტა ხნის წინ დაადასტურა თავად კირილ დმიტრიევმა. საინფორმაციო სააგენტო Reuters-ის ცნობით, დმიტრიევი უკვე შეხვდა ტრამპის სპეციალურ წარმომადგენელს, სტივ უიტკოფს, თუმცა შედეგების შესახებ არაფერია ცნობილი. 

• ვიზიტი მხოლოდ მას შემდეგ გახდა შესაძლებელი, რაც სახელმწიფო დეპარტამენტმა შეაჩერა დმიტრიევისთვის დაწესებული სანქციების მოქმედება.
  
  
• დმიტრიევი, რომელიც ერ-რიადში გამართულ მოლაპარაკებებსაც ესწრებოდა ვლადიმირ პუტინთან დაახლოებული პირი - ცნობილია, რომ მისი მეუღლე მეგობრობს ვლადიმირ პუტინის ერთ-ერთ ქალიშვილთან. 
  
  
• სტენფორდში ნასწავლი დმიტრიევს ამერიკის ფინანსურ წრეებთან კარგი ურთიერთობები აქვს - 2000-იან წლებში ის ხელმძღვანელობდა ამერიკული Goldman Sachs-ის მიერ მოსკოვში დაფუძნებულ კერძო საინვესტიციო ფონდს. 
  
  

Big Picture: ტრამპის ადმინისტრაციასთან კომუნიკაციის დასამყარებლად დმიტრიევის როლი ინსტრუმენტული აღმოჩნდა - სწორედ დმიტრიევი არაბი ბიზნესმენის მეშვეობით დაუკავშირდა დოჰაში მყოფ სტივ უიტკოფს, რამაც საფუძველი დაუდო მოლაპარაკებების პარალელურ ფორმატს. 

• დმიტრიევთან შეხვედრის შემდეგ უიტკოფი მოსკოვში გაემართა, სადაც პუტინთან 3-საათიანი შეხვედრა გამართა, რომლის მთავარი შედეგიც პატიმრების გაცვლა გახდა. 
  
  
• დმიტრიევის როლი პროცესში უფრო საქმიანი და ის ძირითადად ეკონომიკურ თანამშრომლობაზე აკეთებს აქცენტს. დმიტრიევი ცდილობს ტრამპის ადმინისტრაცია დაარწმუნოს, რომ რუსეთთან ახლო თანამშრომლობა ფინანსურად მომგებიანი იქნება შტატებისთვის. 

Context: დმიტრიევის ვიზიტი თეთრ სახლსა და კრემლს შორის რიტორიკული დაძაბულობის ფონზე მიმდინარეობს. 30 მარტს NBC-სთან ინტერვიუში ტრამპმა განაცხადა, რომ პუტინზე გაბრაზებული იყო და რუსეთს ნავთობის გაყიდვაზე დამატებითი შეზღუდვების დაწესებით დაემუქრა. 

• "თუ კი რუსეთთან ვერ მივაღწევთ შეთანხმებას უკრაინაში სისხლისღვრის შეწყვეტის შესახებ და თუ მივიჩნიე, რომ ეს რუსეთის მიზეზით მოხდა - ეს შესაძლოა ასე არ იყოს - თუ ჩავთვლი, რომ ეს რუსეთის ბრალია მე დავაწესებ მეორად ტარიფებს რუსული ნავთობის გაყიდვაზე. რუსეთიდან მომავალ მთელ ნავთობზე"- თქვა ტრამპმა. 
  
  
• უკვე პირველ აპრილს რუსეთის საგარეო საქმეთა მინისტრის პირველმა მოადგილემ, სერგეი რიაბკოვმა განაცხადა, რომ კრემლისთვის მიუღებელია აშშ-ს წინადადებები არსებული ფორმით. 
  
  
• МИД-ის მაღალჩინოსნის თქმით, ამ მომენტისთვის თეთრი სახლის მთავარი პრიორიტეტი ცეცხლის შეწყვეტაა, ხოლო კონფლიქტის ფუნდამენტური მიზეზებთან დაკავშირებით ამერიკის წინადადადებები არ ჩანს.