ახალი ამბები

უნგრეთის ყოფილი პრემიერ-მინისტრი ვიქტორ ორბანი ახალგაზრდობაში, სავარაუდოდ, კომუნისტური რეჟიმის სპეცსამსახურებთან თანამშრომლობდა და მათ ინფორმაციას აწვდიდა, ხოლო ამ ანგარიშების დედნები შესაძლოა მოსკოვში ინახებოდეს.

ვითარების არსი: უნგრელი ჟურნალისტის საბოლჩ პანის გამოძიების თანახმად, უნგრეთის ყოფილმა პრემიერ-მინისტრმა მიკლოშ ნემეტიმ, რომელიც მთავრობას 1988-1990 წლებში ხელმძღვანელობდა, გაიხსენა შეხვედრა, რომელიც 1990 წლის მარტში, ეროვნულ ასამბლეაში პირველ თავისუფლად ჩატარებულ არჩევნებამდე ცოტა ხნით ადრე შედგა.

• მისი თქმით, მაშინდელმა თავდაცვის მინისტრმა ფერენც კარპატიმ მას სამი ხელით დაწერილი და ხელმოწერილი აგენტურული ანგარიში გადასცა, რომლებიც ორბანს ეკუთვნოდა.

სტრიქონებს შორის: ნემეტის თქმით, ეს ანგარიშები შეიცავდა ორბანის დაკვირვებებს ზალაეგერსეგში სავალდებულო სამხედრო სამსახურის გავლისას სხვა სამხედროებზე, კერძოდ, მათი ქცევის, აგრეთვე პოლიტიკური, სექსუალური და რელიგიური შეხედულებების შესახებ.

• თუმცა, ნემეტმა აღნიშნა, რომ მას არ ჰქონია ავტორის ვინაობის, ხელწერილისა და ხელმოწერის ნამდვილობის გადამოწმების საშუალება, თუმცა, როგორც ეჩვენებოდა, ისინი იცნო.
• დოკუმენტები მან კარპატს დაუბრუნა, ასლები კი არ შემოუნახავს. მოგვიანებით დოკუმენტები გაქრა, ამიტომ სად არის ისინი ახლა - უცნობია.
• ორბანის პრესმდივანმა  ეს ინფორმაცია ფეიკად შეაფასა.

დიდი სურათი: მიკლოშ ნემეტმა საკუთარი ინფორმაცია უნგრეთში ხელისუფლების ცვლილების შემდეგ გაასაჯაროვა, როდესაც ეს კანონმდებლობის შეცვლის წყალობით გახდა შესაძლებელი.

• ნემეტის თქმით, რომელიც უკვე პენსიაზეა, ბოლო წლებში ის ელოდა კანონმდებლობაში ისეთ ცვლილებებს, რომლებიც შესაძლებლობას მისცემდა, საჯარო გაეხადა მის ხელთ არსებული მასალები. ამიტომ სექტემბერში, მას შემდეგ, რაც უნგრეთის მთავრობამ სახელმწიფო დოკუმენტებზე ხელმისაწვდომობის გაფართოების შესახებ კანონი მიიღო, მან ეს მასალები არქივს გადასცა.

• 4 ნოემბერს, უნგრეთმა ათასობით დოკუმენტი გამოაქვეყნა, რომლებიც შეიცავს მონაცემებს იმ პირთა შესახებ, რომლებსაც კომუნისტური რეჟიმის დროინდელი სახელმწიფო უსაფრთხოების სამსახურები ოფიცრების, ინფორმატორების, კოლაბორაციონისტების ან პოტენციური აგენტების სიებში ატარებდნენ.