ახალი ამბები

ირანის მხრიდან სიცოცხლის მოსპობის მუქარის გამო, აშშ-ის ფინანსთა მინისტრი, სკოტ ბესენტი საცხოვრებელი სახლიდან სამხედრო ბაზაზე გადავიდა.

პარალელურად, აშშ-მა დიდ ბრიტანეთში მდებარე სამხედრო ბაზებზე უსაფრთხოების ზომები გაამკაცრა და 13 სამხედრო თვითმფრინავი სხვა ავიაბაზებზე გადაიყვანა.

ვითარების არსი: Fox News Digital-ის ცნობით, აშშ-ის ფინანსთა სამინისტრომ სამშაბათს დაადასტურა, რომ ირანის მხრიდან სიცოცხლის მოსპობის მუქარის გამო, სკოტ ბესენტი საკუთარი საცხოვრებელი სახლიდან სამხედრო ბაზაზე გადავიდა.

• ბესენტი აგვისტოდან ხელმძღვანელობს ირანის წინააღმდეგ სანქციებისა და ეკონომიკური ზეწოლის კამპანიას.

• კამპანიის მიზანია თეირანზე ზეწოლა, რათა მან შეწყვიტოს გემებზე თავდასხმები და გახსნას ჰორმუზის სრუტე, რომელიც 28 თებერვალს აშშ-ისა და ისრაელის მიერ ირანზე განხორციელებული თავდასხმების შემდეგ, ძირითადად, ჩაკეტილია.

• Reuters-ის მიერ მოპოვებული სადაზვერვო მემორანდუმის თანახმად, აშშ-ის ოფიციალური პირებისა და მოქალაქეების წინააღმდეგ ირანული თავდასხმების გეგმებმა მომზადების მოწინავე ეტაპს მიაღწია.

ბაზები ბრიტანეთში: 9 ნოემბერს, აშშ-მა RAF Mildenhall-ის ბაზიდან 13 სამხედრო თვითმფრინავი შოტლანდიაში, გერმანიასა და ესპანეთში მდებარე სხვა ავიაბაზებზე გადაიყვანა.

• Associated Press-ის ცნობით, მათ შორის იყო KC-135 Stratotanker ტიპის ჰაერში საწვავით გამმართველი თვითმფრინავები და CV-22B ტიპის კონვერტოპლანები.

• ამერიკელი ოფიციალური პირის განცხადებით, ეს პრევენციული ღონისძიება იყო.
  

კონტექსტი: სექტემბერში , დიდ ბრიტანეთში მდებარე RAF Fairford-ის სამხედრო ბაზაზე, სადაც ამერიკელი სამხედროები და თვითმფრინავები არიან განთავსებული, სავარაუდო თავდასხმის საფრთხის შესახებ ინფორმაცია გავრცელდა.

• ოქტომბერში აშშ-მა ბაზიდან ყველა B-1B Lancer ტიპის სტრატეგიული ბომბდამშენი გაიყვანა.

• ოქტომბრის ბოლოს, ბრიტანეთის კონტრტერორისტულმა პოლიციამ, ბაზასთან დაკავშირებული ინციდენტის გამოძიების ფარგლებში, ორ მამაკაცს ბრალი წაუყენა. ერთ-ერთ მათგანს უცხოური დაზვერვის სამსახურის დახმარებაში ადანაშაულებენ. გამომძიებლების ვარაუდით, საუბარია ირანის დაზვერვაზე.

• ცალკე, Axios-ის ცნობით, აშშ-ში ირანთან სავარაუდოდ დაკავშირებული ტერორისტული თავდასხმების დაგეგმვის საქმეზე სამ პირს წაუყენეს ბრალი. ბრალდებები მოიცავს სექტემბერში RAF-ის ბაზაზე თავდასხმის სავარაუდო გეგმასაც.

• ბრალდების დოკუმენტების თანახმად, ერთ-ერთი ტერორისტული დაჯგუფების ლიდერი ციხიდან თანამზრახველებთან კოდირებული შეტყობინებებით დაკავშირებასა და მათი მოქმედებების კოორდინაციას ცდილობდა.