ახალი ამბები

20 ივლისს, გაერთიანებული სამეფოს მეფე ჩარლზ მესამემ ახალი პრემიერ-მინისტრის, ენდი ბერნემის მიერ შეთავაზებული მთავრობის შემადგენლობა დაამტკიცა.

ვითარების არსი: თანამდებობები დაკარგეს ყოფილი პრემიერის, კირ სტარმერის ერთგულმა მოკავშირეებმა, ფინანსთა მინისტრმა რეიჩელ რივსმა და ვიცე-პრემიერმა დევიდ ლემიმ.

• ქვეყნის ფინანსთა მინისტრის გავლენიანი თანამდებობა თავდაცვის ყოფილმა მინისტრმა, ჯონ ჰილიმ დაიკავა. რამდენიმე კვირის წინ ჰილი თანამდებობიდან გადადგა, რადგან სტარმერისგან თავდაცვის ხარჯების უფრო მეტად გაზრდას ითხოვდა.
• ჰილის გადადგომამ ასევე მნიშვნელოვანი დარტყმა მიაყენა სტარმერის თანამდებობაზე დარჩენის შანსებს.
• პრემიერის ადმინისტრაციაში POLITICO-ს წყაროს ცნობით, ბერნემსა და ჰილის "ერთნაირი ხედვა" აქვთ რეინდუსტრიალიზაციის, დეცენტრალიზაციისა და ფასების ზრდასთან ბრძოლის საკითხებში.

სტრიქონებს შორის: ბრიტანეთის საგარეო საქმეთა მინისტრის თანამდებობა კი ლეიბორისტული პარტიის ყოფილმა ლიდერმა, ედ მილიბენდმა დაიკავა, რომელიც სტარმერის კაბინეტში ენერგეტიკის მინისტრი იყო.

• ის ბრიტანეთის მთავრობის ერთ-ერთი პირველი წარმომადგენელი იყო, ვინც საჯაროდ მოუწოდა სტარმერს გადამდგარიყო.
• მილიბენდის ერთ-ერთი მთავარი გამოწვევა აშშ-თან ურთიერთობები იქნება. მთავრობაში ყოფნისას ის აქტიურად ითხოვდა, რომ ირანთან ომისას ბრიტანეთს აშშ-სთვის არ დაეთმო დიეგო გარსიას ავიაბაზა ინდოეთის ოკეანეში.

ჩაშლილად: გაერთიანებული სამეფოს თავდაცვის მინისტრი უესტ სტრიტინგი გახდა. ის ლეიბორისტული პარტიის ლიდერობის ერთ-ერთ კანდიდატად მოიაზრებოდა, თუმცა, საბოლოოდ მან ბერნემს დაუჭირა მხარი.

• სტრიტინგს გაკეთებული აქვს რამდენიმე განცხადება თავდაცვის დაფინანსებაზე - იგი მხარს უჭერდა "ომის ობლიგაციების" იდეას თანხების მოსაზიდად და მოითხოვდა მოძველებული სამხედრო პროგრამების გაუქმებას.
• თუმცა, მას არასდროს უმუშავია საგარეო ან უსაფრთხოების მიმართულებით და ბევრი მის კანდიდატურას სკეპტიკურად უყურებს.

დიდი სურათი: შინაგან საქმეთა მინისტრის თანამდებობა შეინარჩუნა შაბანა მაჰმუდმა. მილიბენდთან ერთად, მაჰმუდი ერთ-ერთი პირველი იყო, ვინც სტარმერს გადადგომისკენ მოუწოდა. არსებობს მოლოდინი, რომ მაჰმუდმა შეიძლება საიმიგრაციო რეფორმა შეარბილოს ლეიბორისტული პარტიის მემარცხენე ფრთის ზეწოლით.

• ქვეყნის ენერგეტიკის მინისტრად მიატა ფანბულე დაინიშნა. ის ანალიტიკური ცენტრის ყოფილი ხელმძღვანელია და ბერნემს პოლიტიკის საკითხებში უწევდა კონსულტაციას. ფანბულე  ჯერ ენერგეტიკის უმცროს მინისტრად, შემდეგ კი თემთა მინისტრად მუშაობდა, სანამ მაისში სტარმერზე ზეწოლის მოხდენის მიზნით არ გადადგა.
• ბრიტანეთის ახალმა პრემიერ-მინისტრმა, ენდი ბერნემმა უკვე განაცხადა, რომ ოქტომბერში მოსახლეობისთვის ელექტროენერგიის გადასახადებზე დღგ-ს გააუქმებს: საყოფაცხოვრებო ელექტროენერგიაზე დღგ-ის განაკვეთი 1 ოქტომბრიდან 5%-დან 0%-მდე შემცირდება.

კონტექსტი: ამ საკადრო ცვლილებების ერთ-ერთი დამარცხებული ივეტ კუპერია. იგი საგარეო საქმეთა მინისტრობიდან ჯანდაცვის მინისტრად ჩამოაქვეითეს, თუმცა ეს პოსტი ბევრად უფრო მაღალი პოლიტიკური პროფილის გახდება, რადგან ბერნემმა პირობა დადო, რომ სოციალური ზრუნვის და ჯანდაცვის სისტემის რეფორმირებას გეგმავს.