ახალი ამბები

სომხეთის საპარლამენტო არჩევნებში ნიკოლ ფაშინიანის პარტია "სამოქალაქო ხელშეკრულებამ" გაიმარჯვა, თუმცა, საკონსტიტუციო უმრავლესობის მოპოვება ვერ შეძლო. სწორედ ამიტომ, სომხეთის ხელისუფლება დასავლელი შუამავლების დახმარებით ცდილობს აზერბაიჯანის პრეზიდენტი ილჰამ ალიევი დაარწმუნოს, უარი თქვას სომხეთის კონსტიტუციის შეცვლის მოთხოვნაზე.

ვითარების არსი: ამ ინფორმაციას გაზეთი "ჰრაპარაკი" სომხეთის მთავრობაში წყაროებზე დაყრდნობით ავრცელებს.

• გამოცემის ინფორმაციით, სანაცვლოდ ერევანი ბაქოს ალტერნატიულ გადაწყვეტილებებს სთავაზობს. კერძოდ, სომხური მხარე მზადაა წარადგინოს გარანტიები ქვეყანაში რევანშისტული განწყობების შემდგომი განვითარების აღსაკვეთად.
• მედიასაშუალება ვარაუდობს, რომ ეს შესაძლოა იყოს ხანგრძლივი პატიმრობის ვადების შემოღება იმ პოლიტიკოსებისთვის, რომლებმაც ყარაბაღის საკითხი საკუთარი პოლიტიკური დისკურსის ნაწილად აქციეს. გაზეთის მონაცემებით, მოლაპარაკებებს ჯერჯერობით შედეგი არ მოუტანია.
• ამასთან, ეს საკითხი განიხილებოდა 14 ივნისს, დილიჟანში აზერბაიჯანის პრეზიდენტის თანაშემწის, ჰიქმეთ ჰაჯიევის ვიზიტის დროს.

სტრიქონებს შორის: სომხეთის პრემიერ-მინისტრი ნიკოლ ფაშინიანი 2024 წლის იანვრიდან საუბრობს საკონსტიტუციო რეფორმის აუცილებლობაზე და აცხადებს, რომ ქვეყანას სჭირდება ახალი კონსტიტუცია, რომელიც ასახავს თანამედროვე რეალობას.

• 16 აპრილს სომხეთის პრემიერმა ეროვნულ ასამბლეაში განაცხადა, რომ ახალი კონსტიტუციის გარეშე სასამართლო სისტემის პრობლემების ნაწილის მოგვარება შეუძლებელია.
• მანამდე მან აღნიშნა, რომ ახალი კონსტიტუცია არ უნდა შეიცავდეს მითითებებს დამოუკიდებლობის დეკლარაციაზე, რადგან ეს, მისი შეფასებით, კონფლიქტის რისკებს ქმნის.
• კერძოდ, დეკლარაციის ერთ-ერთი პუნქტი ითვალისწინებს სომხეთის გაერთიანებას მთიან ყარაბაღთან, რასაც აზერბაიჯანი ეწინააღმდეგება და კონსტიტუციის შეცვლას სამშვიდობო შეთანხმების ხელმოწერის წინაპირობად აყენებს.

კონტექსტი: 10 ივნისს სომხეთის იუსტიციის მინისტრმა სრბუი გალიანმა განაცხადა, რომ ახალი კონსტიტუციის პროექტის გამოქვეყნების გადაწყვეტილებას უახლოეს კვირებში მიიღებენ.

• დოკუმენტის გასაჯაროების ვადები მას არ დაუკონკრეტებია.
• აზერბაიჯანის ხელისუფლებამ არაერთხელ განაცხადა, რომ სამშვიდობო შეთანხმების ხელმოსაწერად სომხეთმა კონსტიტუცია უნდა შეცვალოს და დამოუკიდებლობის დეკლარაციაზე მითითებები ამოიღოს.