ახალი ამბები

უკრაინის ყოფილმა თავდაცვის მინისტრმა მიხაილო ფედოროვმა 18 აგვისტოს განაცხადა, რომ უკრაინელებმა არ უნდა დაუშვან, რომ რუსეთმა განსაზღვროს, როდის შეძლებენ უკრაინელები კვლავ საკუთარი ხელისუფლების არჩევას.

ვითარების არსი: "ჩვენ პასუხი უნდა გავცეთ ფუნდამენტურ შეკითხვას: როგორ უნდა ფუნქციონირებდეს სახელმწიფო, თუ ომი წლობით გაგრძელდება? თუ ომი კიდევ ერთი წელი გაგრძელდება? ორი? სამი? შეიძლება თუ არა რუსეთმა ფაქტობრივად მიიღოს უფლება განსაზღვროს, როდის შეძლებენ უკრაინელები კვლავ საკუთარი ხელისუფლების არჩევას? დარწმუნებული ვარ, რომ არა. დემოკრატია არ შეიძლება იყოს რუსეთის მძევალი." - ხაზი გაუსვა მან.

• ფედოროვის თქმით, უკრაინამ უნდა იპოვოს კანონიერი, უსაფრთხო და რეალისტური მექანიზმი, რომელიც შესაძლებელს გახდის სრულფასოვანი დემოკრატიული პროცესის განახლებას გაჭიანურებული ომის პირობებშიც კი.

სტრიქონებს შორის: "ეს რთულია. საჭიროა სამხედროებისთვის ხმის მიცემის უფლების უზრუნველყოფა. საზღვარგარეთ მყოფი მილიონობით უკრაინელისთვის. ფრონტისპირა რეგიონებში მყოფი ადამიანებისთვის. საჭიროა საარჩევნო პროცესის უსაფრთხოების, ინსტიტუტების დამოუკიდებლობისა და შედეგისადმი ნდობის უზრუნველყოფა. მაგრამ სირთულე არ ნიშნავს შეუძლებლობას. უკრაინამ უკვე მრავალჯერ გააკეთა ის, რაც მსოფლიოს შეუძლებლად მიაჩნდა." - აღნიშნა მან.

• ყოფილი მინისტრი ამტკიცებს, რომ "განსაკუთრებით საშიშია, როდესაც საზოგადოებაში ჩნდება განცდა, რომ ადამიანის დანიშვნის მთავარი კრიტერიუმი არის არა მისი პროფესიონალიზმი, არა შედეგი და არა ქვეყნის შეცვლის უნარი, არამედ სისტემისადმი პირადი ლოიალობა". 
• "ასე ვერ იფუნქციონირებს თანამედროვე სახელმწიფო. და მით უმეტეს ვერ იფუნქციონირებს ქვეყანა, რომელიც თავისი არსებობისთვის ომს აწარმოებს. ჩვენ ასევე უნდა ვილაპარაკოთ კორუფციაზეც. არა იმიტომ, რომ ეს მოდური სიტყვაა. არამედ იმიტომ, რომ ომის დროს კორუფცია სრულიად სხვა მნიშვნელობას იძენს." - ხაზი გაუსვა ფედოროვმა.

დიდი სურათი: გარდა ამისა, მან აღნიშნა, რომ მიმდინარე ომის პირობებში, როდესაც რუსეთის ფედერაცია ტაქტიკას ცვლის და ყოველდღიურად უაღრესად მნიშვნელოვანი გადაწყვეტილებების მიღება უწევთ, უკრაინა ვერ დარჩება სრულფასოვნად დანიშნული თავდაცვის მინისტრის გარეშე: "ეს არ არის ნორმალური."

• 18 აგვისტოს პრეზიდენტმა ვოლოდიმირ ზელენსკიმ უმაღლეს რადაში შეიტანა წარდგინება თავდაცვის სამინისტროსა და საგარეო საქმეთა სამინისტროს ხელმძღვანელების თანამდებობებზე ევგენი ხმარასა და ანდრი სიბიჰას კანდიდატურების განსახილველად.
• უკრაინაში უკვე ერთ თვეზე მეტია გრძელდება საპროტესტო აქციები ყოფილი თავდაცვის მინისტრის, მიხაილო ფედოროვის მხარდასაჭერად.
• 16 აგვისტოს, კიევის ცენტრში გაიმართა მსვლელობა ფედოროვის თავდაცვის მინისტრის თანამდებობაზე დაბრუნებისა და ხელისუფლებასა და საზოგადოებას შორის დიალოგის მოთხოვნით.