ახალი ამბები

ირანელმა სამხედრო მეთაურმა ხუთშაბათს ამერიკის შეერთებული შტატები და ისრაელი გააფრთხილა, თავი შეიკავონ ირანზე ნებისმიერი სახის თავდასხმისგან, როდესაც ქვეყანა უზენაესი ლიდერის, აიათოლა ალი ხამენეის სახელმწიფო დაკრძალვის ცერემონიისთვის ემზადება.

ვითარების არსი: "ჩვენ ვაფრთხილებთ ირანის მტრებს, განსაკუთრებით აშშ-სა და სიონისტურ რეჟიმს (ისრაელს), თავი აარიდონ ყოველგვარ არასწორ გათვლას და დაფიქრდნენ იმ მკაცრ პასუხზე, რომელსაც ჩვენი შეიარაღებული ძალები გასცემენ ნებისმიერ მუქარასა და აგრესიას ჩვენი ქვეყნის წინააღმდეგ," - ნათქვამია ირანის შეიარაღებული ძალების ცენტრალური შტაბის მეთაურის, ალი აბდოლაჰის განცხადებაში, რომელსაც სახელმწიფო მედია ავრცელებს.

• ხამენეის დაკრძალვის ცერემონია 4 ივლისს თეირანში დაიწყება და 9 ივლისს, მის მშობლიურ ქალაქ მაშჰადში დაკრძალვით დასრულდება, ხოლო ამ თარიღებს შორის დამატებითი ცერემონიები იგეგმება ყუმსა და ერაყში.

სტრიქონებს შორის: ოთხშაბათს, ირანის საგარეო საქმეთა მინისტრმა აბას არაღჩიმ მსგავსი გაფრთხილება გააჟღერა და აღნიშნა, რომ თეირანი მყისიერ და მძლავრ პასუხს გასცემს მისი ხალხის ან ხელისუფლების წინააღმდეგ მიმართულ ნებისმიერ მუქარას.

• ეს მოჰყვა ისრაელის თავდაცვის მინისტრის, ისრაელ კაცის განცხადებას იმის შესახებ, რომ ირანის ამჟამინდელი უზენაესი ლიდერი მოჯთაბა ხამენეი "სიკვდილისთვის არის განწირული."

დიდი სურათი: ირანული მედია წერს, რომ დაკრძალვის პერიოდში უსაფრთხოების ზომები გამკაცრებულია, ხოლო ირანის სამოქალაქო ავიაციის ორგანიზაციის ხელმძღვანელმა ოთხშაბათს განაცხადა, რომ რამდენიმე ქალაქის, მათ შორის თეირანისა და მაშჰადის თავზე საჰაერო სივრცეში დროებითი შეზღუდვები დაწესდება.

• 2026 წლის 28 თებერვალს, დაიწყო აშშ-ისრაელის სამხედრო ოპერაცია ირანის წინააღმდეგ. ომის პირველივე დღე მოკლეს ირანის უზენაესი ლიდერი აიათოლა ალი ხამენეი და ირანის სამხედრო ელიტის დიდი ნაწილი.
• ხამენეი ისრაელის სამხედრო-საჰაერო ძალების მიერ მისი რეზიდენციის დაბომბვის შედეგად დაიღუპა.