ახალი ამბები

ისრაელი და ლიბანი, აშშ-ის შუამავლობით, ცეცხლის შეწყვეტაზე შეთანხმდნენ. 

ინფორმაციას აშშ-ის სახელმწიფო დეპარტამენტი ადასტურებს. შეთანხმება 2 და 3 ივნისს გამართული სამმხრივი მოლაპარაკებების შედეგი გახდა.

დეტალები: შეთანხმების პირობების თანახმად, ირანის მიერ მხარდაჭერილმა დაჯგუფება "ჰეზბოლამ" უნდა შეწყვიტოს ცეცხლი და დატოვოს სამხრეთ ლიბანის ტერიტორია - საზღვრიდან მდინარე ლიტანიმდე.

• ერთობლივ განცხადებაში ასევე ნათქვამია, რომ "ისრაელსა და ლიბანს შორის ურთიერთობების მომავალი ორი ქვეყნის სუვერენულმა მთავრობებმა უნდა გადაწყვიტონ".
• ისრაელმა და ლიბანმა ასევე დაადასტურეს, რომ მათ "არ აქვთ მტრული ზრახვები ერთმანეთის მიმართ" და აიღეს ვალდებულება, გააგრძელონ პირდაპირი მოლაპარაკებები. ორმხრივი მოლაპარაკებები 22 ივნისს დაიწყება.

კონტექსტი: მიმდინარე წლის მაისის ბოლოს ისრაელმა გააფართოვა სახმელეთო ოპერაცია ლიბანში და დარტყმები მიაყენა ბეირუთის სამხრეთ გარეუბნებს, მათ შორის დაჰიას - "ჰეზბოლას" საყრდენ პუნქტს.

• ეს გადაწყვეტილება, მას შემდეგ მიიღეს, რაც "ჰეზბოლამ" გააძლიერა თავდასხმები ისრაელის ჩრდილოეთ რეგიონებზე.
• ივნისის დასაწყისში ირანულმა მედიამ გავრცელა ინფორმაცია, რომ ლიბანზე ისრაელის დარტყმების გამო თეირანი აშშ-სთან ომის შეწყვეტის შესახებ მოლაპარაკებებს წყვეტს.
• "Axios"-ის მონაცემებით, აშშ-ის პრეზიდენტმა სატელეფონო საუბარი გამართა ისრაელის პრემიერ-მინისტრთან, რომელშიც იგი მკაცრად გააკრიტიკა ლიბანთან კონფლიქტის ესკალაციის გამო და ბენიამინ ნეთანიაჰუს შეშლილი უწოდა.