ახალი ამბები

პარასკევს, 1413 დღე გავიდა, რაც ჯორჯა მელონის მთავრობა იტალიას მართავს. ამით ის იტალიის რესპუბლიკის ისტორიაში, დიქტატორ ბენიტო მუსოლინის შემდეგ, ყველაზე ხანგრძლივად მმართველი მთავრობა ხდება.

ვითარების არსი: Euractiv-ის ცნობით, მოქმედმა მთავრობამ ხანგრძლივობით გადაასწრო სილვიო ბერლუსკონის მეორე მთავრობას, რომელიც 1412 დღის განმავლობაში მართავდა ქვეყანას.

• მელონის პარტია "იტალიის ძმები" ამ მოვლენას საჯაროდ აღნიშნავს.
• სამხრეთ იტალიაში, ქალაქ ბარიში მისი პარტიის ათასობით მხარდამჭერს ელოდებიან. იტალიის პრემიერი მათ სიტყვით მიმართავს, აქციის ლოზუნგი კი ასეთია: "ყველაზე სტაბილური მთავრობა - უფრო ძლიერი იტალია."

სტრიქონებს შორის: Euractiv ხაზს უსვამს, რომ მელონი აღარ არის ის პოლიტიკური ფენომენი, რომელიც ხელისუფლებაში 2022 წლის ოქტომბერში მოვიდა.

• იმის გათვალისწინებით, რომ მომავალ წელს საპარლამენტო არჩევნები უნდა ჩატარდეს, მთავარი კითხვაა რამდენ ხანს გაგრძელდება მელონისა და მემარჯვენე ძალების დომინირება იტალიურ პოლიტიკაში.
• მელონის პარტია "იტალიის ძმები" საზოგადოებრივი აზრის კვლევებში ლიდერობს და დაახლოებით 26%-ს აგროვებს, თუმცა ამ ზაფხულის რამდენიმე გამოკითხვის შედეგებით, მელონის მემარჯვენე-ცენტრისტული კოალიციის საერთო უპირატესობა შემცირდა მემარცხენე-ცენტრისტულ ბლოკთან შედარებით. 
• თუმცა, მემარცხენე-ცენტრისტებს, რომლებიც ახლა ცდილობენ გაერთიანდნენ "ფართო ველის" (campo largo) გარშემო - რაც მოიცავს მემარცხენე-ცენტრისტულ და უფრო მემარცხენე ძალებს - კვლავ არ ჰყავთ მკაფიო ლიდერი. 

დიდი სურათი: იტალიაში შემდეგი არჩევნები 2027 წლის სექტემბერში უნდა ჩატარდეს, თუმცა არსებობს მოლოდინი, რომ გაზაფხულზე ვადამდელი არჩევნები შეიძლება დაინიშნოს.

• ცოტა ხნის წინ, ჯორჯა მელონიმ აშშ-ის პრეზიდენტ დონალდ ტრამპთან თავის დაძაბულ ურთიერთობაზე ისაუბრა. მელონიმ განაცხადა, რომ არ ნანობს აშშ-ის პრეზიდენტ დონალდ ტრამპთან მჭიდრო კავშირების დამყარების მცდელობებს, მიუხედავად საჯარო უთანხმოებებისა.