ახალი ამბები

არგენტინის პრეზიდენტი გამორიცხავს ფოლკლენდის (მალვინის) კუნძულების დასაბრუნებლად ძალისმიერი ნაბიჯების გადადგმას, თუმცა ბრიტანეთზე ზეწოლას მანამ გააგრძელებს, სანამ არქიპელაგზე კონტროლის აღდგენას არ მიაღწევს. 

ვითარების არსი: "გაეროს ბოლო სესიაზე პირველად მოუხდათ მათ [ბრიტანეთს] თავად წამოეჭრათ მალვინის კუნძულების თემა. ისინი გრძნობენ ზეწოლას, შეწუხებული არიან და დისკომფორტს განიცდიან. ჩვენ კი გავაგრძელებთ მათთვის ამ დისკომფორტის შექმნას მანამ, სანამ კუნძულებს არ დაგვიბრუნებენ, რადგან ისინი ჩვენია," - განაცხადა მან გამოცემა El Observador-თან ინტერვიუში.

• ამასთან, მილეიმ ხაზგასმით აღნიშნა, რომ არგენტინა სამხედრო მეთოდებით მოქმედებას არ აპირებს.
• "ჩვენ არ გვჯერა ძალისმიერი გადაწყვეტების, თუმცა დარწმუნებული ვართ, რომ ყველა კოზირი ჩვენს მხარესაა და კუნძულები ჩვენ უნდა დაგვიბრუნდეს. დღეს არგენტინას, რომლის ეკონომიკური წონაც იზრდება ისეთი პროექტების წყალობით, როგორიცაა, მაგალითად, [ნავთობისა და გაზის საბადო] 'ვაკა მუერტა', ეძლევა შესაძლებლობა გაათამაშოს კარტი, რაც მანამდე არ გვქონდა," - ხაზი გაუსვა არგენტინის პრეზიდენტმა.
• მილეის აზრით, მალვინის კუნძულებთან ნავთობის საბადოების დამუშავებაში ბუენოს-აირესის ნებართვის გარეშე მონაწილეობის გამო სანქციების დაწესების რისკი, უცხოურ კომპანიებს უფრო დიდი ალბათობით დააფრთხობს.

სტრიქონებს შორის: არგენტინის ლიდერს მიაჩნია, ბუენოს-აირესის პოზიციებს ასევე ამყარებს ის ფაქტიც, რომ "ბრიტანეთს ბევრი პრობლემა აქვს: ეკონომიკური, დემოგრაფიული, მიგრაციული."

• 3 სექტემბერს, ერისადმი მიმართვაში, მილეიმ განაცხადა, რომ პარლამენტს წარუდგენს კანონპროექტს იმ კომპანიების მიმართ სანქციების გამკაცრების შესახებ, რომლებიც მალვინის კუნძულებთან ნავთობს მოიპოვებენ.
• ამის მიზეზი გახდა ბრიტანული კომპანია Rockhopper Exploration-ისა და ისრაელის Navitas Petroleum-ის მიერ Sea Lion-ის ნავთობის საბადოების ათვისების პროექტის დაწყება.
• მოგვიანებით არგენტინის მთავრობამ სანქციები დაუწესა 60 იურიდიულ და ფიზიკურ პირს, რომლებიც სადავო ტერიტორიაზე ნახშირწყალბადებს მოიპოვებენ.

დიდი სურათი: ფოლკლენდის კუნძულები 2 მსხვილი და თითქმის 800 მცირე კუნძულისგან შედგება, რომელთა საერთო ფართობი 12 ათას კვ. კმ-ზე ოდნავ მეტია, ხოლო მოსახლეობა - დაახლოებით 3.2 ათასი ადამიანი.

• უკვე 200 წელია ეს კუნძულები არგენტინასა და ბრიტანეთს შორის ტერიტორიული დავის საგანია.
• 1982 წლის აპრილში კუნძულებისთვის ქვეყნებს შორის შეიარაღებული კონფლიქტი დაიწყო. არგენტინა დამარცხდა და 2.5 თვის განმავლობაში 649 სამხედრო დაკარგა. ბრიტანული მხარის დანაკარგმა 255 ადამიანი შეადგინა.