ახალი ამბები

ნორვეგიის მთავრობამ განაცხადა, რომ უკრაინის საჰაერო თავდაცვის გასაძლიერებლად 3 მილიარდ კრონს (268 მლნ ევრო - რედ.) გამოყოფს ამერიკული შეიარაღების შესყიდვის პროგრამა PURL-ისთვის.

ვითარების არსი: ეს თანხა Patriot-ის სისტემებისთვის საჰაერო თავდაცვის რაკეტების შესყიდვაზე დაიხარჯება. ნორვეგია, დანიასთან, გერმანიასთან და კანადასთან ერთად, ახალ რაკეტებს პირდაპირ აშშ-ის ქარხნებს შეუკვეთავს PURL პროგრამის ფარგლებში.

• ნორვეგიის მთავრობაში განმარტეს, რომ ვინაიდან ამ რაკეტებიდან ზოგიერთის მიწოდების ვადები საკმაოდ ხანგრძლივია, ნორვეგია გეგმავს ისინი შეიძინოს იმ ქვეყნებისგან, რომლებსაც ეს შეიარაღება უკვე აქვთ, რათა უკრაინამ ისინი რაც შეიძლება სწრაფად მიიღოს.
• "უკრაინის ბრძოლა საკუთარი თავდაცვისთვის - ეს არის ჩვენი ბრძოლა ჩვენივე თავდაცვისთვის. უკრაინა ყოველდღიურად უმკლავდება რუსულ თავდასხმებს. რუსეთი აგრძელებს დარტყმებს ადამიანებზე, უკრაინულ ქალაქებსა და ენერგომომარაგების ობიექტებზე. უკრაინა ახერხებს დრონებისა და ფრთოსანი რაკეტების უმრავლესობის ჩამოგდებას, მაგრამ მას ესაჭიროება უფრო მძლავრი თავდაცვა ბალისტიკური რაკეტების წინააღმდეგ," - განაცხადა ქვეყნის პრემიერ-მინისტრმა იონას გარ სტორემ.

სტრიქონებს შორის: ნორვეგია ასევე გამოყოფს ფინანსურ რესურსებს, რათა შეუერთდეს ბალისტიკური რაკეტების საწინააღმდეგო სისტემების ერთობლივად შემუშავების ინიციატივას.

• უკრაინის პრეზიდენტმა ვოლოდიმირ ზელენსკიმ ანკარაში ნატოს სამიტის დროს განაცხადა, რომ პარტნიორებთან დისკუსიების მთავარი თემა Patriot-ის საზენიტო-სარაკეტო კომპლექსების რაკეტები იქნება, რომლებსაც კრიტიკული მნიშვნელობა აქვთ უკრაინის მიერ რუსული ბალისტიკური რაკეტების ჩამოგდების შესაძლებლობისთვის.
• მან ასევე აღნიშნა, რომ ეს რაკეტები მხოლოდ აშშ-ს არ გააჩნია.

დიდი სურათი: ნიდერლანდებმა, გერმანიამ, ფინეთმა, შვედეთმა, ლიტვამ, ესტონეთმა, ლატვიამ, დანიამ და პოლონეთმა ევროკომისიას მოთხოვნით მიმართეს - რაც შეიძლება სწრაფად გასცეს ნებართვა ამერიკული წარმოების საჰაერო თავდაცვის სისტემების რაკეტების შესყიდვაზე იმ 90 მილიარდი ევროს "თავდაცვითი" ნაწილის ფარგლებში, რომელსაც ევროკავშირი უკრაინას 2026–2027 წლებში გამოუყოფს.

• 6 ივლისს, უკრაინის სამხედრო-საჰაერო ძალების სპიკერმა იური იგნატმა განაცხადა, რომ უკრაინის საჰაერო თავდაცვამ ვერ შეძლო ბალისტიკური ტრაექტორიით მფრინავი 29 რაკეტიდან ვერცერთის ჩამოგდება, რადგან უკრაინაში Patriot-ის სისტემებისთვის განკუთვნილი რაკეტების სერიოზული დეფიციტია.
• "ბალისტიკური რაკეტები რომ ჩამოაგდო, უნდა გქონდეს რითიც ჩამოაგდებ. სისტემები - საკმარისია, საჭიროა რაკეტების მუდმივი მოწოდება. რუსები იყენებენ იმ ფაქტორს, რომ უკრაინაში, ისევე როგორც მთელ მსოფლიოში, PAC2 და PAC3 ტიპის საზენიტო რაკეტების სერიოზული დეფიციტი შეიმჩნევა, ამიტომ რუსები მეტად კონცენტრირდებიან ბალისტიკური რაკეტებით დარტყმებზე." - აღნიშნა იგნატმა.