ახალი ამბები

უკრაინული მხარის მიერ მოპოვებული რუსული გეგმის თანახმად, რუსეთი ზამთრის დაბომბვების კამპანიის დროს გეგმავს უკრაინული ატომური ელექტროსადგურების ენერგოსისტემიდან გათიშვას, სადგურებიდან ერთ კილომეტრში დარტყმებით, აგრეთვე წყალმომარაგების სისტემებზე მასირებული იერიშებს.

ვითარების არსი: The New York Times-ის ცნობით, რუსების გეგმა ენერგეტიკის მინისტრმა დენის შმიგალმა დასავლელ პარტნიორებს წარუდგინა.

• დოკუმენტის თანახმად, რუსეთი უკრაინის სამი მოქმედი ატომური ელექტროსადგურის (რივნეს, ხმელნიცკისა და სამხრეთ უკრაინის) მწყობრიდან გამოყვანას გეგმავს იმ ელექტრო გამანაწილებელი ქვესადგურების რაკეტებით დაბომბვით, რომლებიც მათ ენერგოსისტემასთან აკავშირებს.
• ეს ქვესადგურები რეაქტორებიდან ერთ კილომეტრზე ნაკლებ მანძილზე მდებარეობს.

სტრიქონებს შორის: გეგმაში ასევე აღნიშნულია, რომ მოსკოვი ათობით ბალისტიკურ რაკეტასა და მართვად ავიაბომბს უკრაინის წყალმომარაგების სისტემას - სატუმბ სადგურებსა და გამწმენდ ნაგებობებს ესვრის.

• უკრაინის პრემიერ-მინისტრმა სერჰი კორეცკიმ განაცხადა, რომ 29-30 სექტემბრის ღამეს რუსეთი ენერგეტიკულ ინფრასტრუქტურაზე მასირებულ დარტყმებზე გადავიდა.
• "ზაფხულიდან მოყოლებული, ფაქტობრივად არ ყოფილა დღე, რომ მტერს ენერგეტიკული ინფრასტრუქტურა არ დაებომბა. თუმცა ასეთი მასშტაბური და კომბინირებული შეტევა გათბობის სეზონის დასრულების შემდეგ პირველად მოხდა," - დაწერა პრემიერმა.

დიდი სურათი: მოგვიანებით ცნობილი გახდა, რომ სხვა ენერგეტიკულ ობიექტებთან ერთად, რუსული დაბომბვის შედეგად ტრიპოლიეს თბოელექტროსადგურიც დაზიანდა.

• "დღეს, რუსეთის მორიგი შეტევის შედეგად, ტრიპოლიეს თბოელექტროსადგურის მწარმოებელი მოწყობილობები დაზიანდა. ახლა ჩვენი პირველხარისხოვანი ამოცანაა ტექნიკური მდგომარეობის შეფასება და საჭირო სამუშაოების მოცულობის განსაზღვრა," - ნათქვამია განცხადებაში.