ახალი ამბები

სერბეთის პრეზიდენტმა ალექსანდრ ვუჩიჩმა განაცხადა, რომ უახლოეს მომავალში თანამდებობიდან გადადგომას გეგმავს. 

ვითარების არსი: "რადიო ბელგრადის" ეთერში ვუჩიჩს ჰკითხეს, გეგმავს თუ არა გადადგომას სამი-ოთხი თვის შემდეგ, რაზეც პრეზიდენტმა უპასუხა: "შესაძლოა, უფრო ადრეც."

• "პრეზიდენტის ადმინისტრაციაში წიგნების ჩალაგება დავიწყე. ბევრი წიგნი მაქვს და ვუყურებ, სად წავიღო ისინი," - თქვა ვუჩიჩმა.
• მან განმარტა, რომ თავის კანდიდატურას პრემიერ-მინისტრის პოსტზე განიხილავს და აღნიშნა, რომ საღამოს მნიშვნელოვანი შეხვედრა აქვს დაგეგმილი.
• ვუჩიჩმა ასევე განაცხადა, რომ "არჩევნები რამდენიმე თვეში ჩატარდება, ხოლო სამი თუ ოთხი თვე - ეს ტექნიკური საკითხია."

სტრიქონებს შორის: სერბეთის პრეზიდენტმა თქვა, ყოველდღიურად ფიქრობს იმაზე, ხელისუფლების ამჟამინდელი მაღალჩინოსნებიდან ვინ შეიძლება გახდეს პრეზიდენტობის ახალი კანდიდატი.

• მანამდე ვრცელდებოდა ინფორმაცია, რომ ვუჩიჩი მიმდინარე წლის ბოლომდე რიგგარეშე საპარლამენტო არჩევნების ჩატარებას გეგმავს.

დიდი სურათი: სერბეთში 2024 წლის დეკემბრიდან ანტისამთავრობო აქციები მიმდინარეობს, რომლის მონაწილეებიც ვუჩიჩის გადადგომას ითხოვენ.

• დემონსტრაციები მას შემდეგ დაიწყო, რაც სერბეთის ჩრდილოეთით მდებარე ქალაქ ნოვი-სადის რკინიგზის სადგურზე გადახურვის ჩამონგრევის შედეგად 16 ადამიანი დაიღუპა.