ახალი ამბები

აშშ-ის პრეზიდენტმა დონალდ ტრამპმა ირანის წინააღმდეგ მასშტაბური ეკონომიკური ოპერაციის დაწყება გამოაცხადა, რომელიც მის იზოლაციას ისახავს მიზნად.

ვითარების არსი: "არავის მიუცია ირანის ისლამური რესპუბლიკისთვის შეთანხმების დადების იმაზე მეტი შესაძლებლობა, ვიდრე მე. მათთვის საუბედუროდ, მათ ეს არ გამოიყენეს. ამიტომ, დღეს მე ვაცხადებ ყველაზე გამანადგურებელ ეკონომიკურ ოპერაციას, რომელიც ოდესმე ჩატარებულა რომელიმე ქვეყნის წინააღმდეგ! ეს იქნება უპრეცედენტო მასშტაბის ეკონომიკური ომი და იზოლაცია." - დაწერა მან სოციალურ ქსელ Truth Social-ში. 

• მან აღნიშნა, რომ ნებისმიერი ქვეყანა, რომელიც თავის ფინანსურ ინსტიტუტებს, საწარმოებს, აეროპორტებსა თუ სახელმწიფო ორგანოებს ირანის მხარდაჭერის უფლებას მისცემს, თვითონ შეეჯახება "კოლოსალურ ეკონომიკურ შედეგებს."
• "ნავთობის კონტრაბანდა, სვოპ-ხაზები, ფულადი გზავნილები, სავალუტო ჯიხურები, გემების რეესტრები, ფიქტიური კომპანიები - ეს ყველაფერი დაუყოვნებლივ უნდა შეწყდეს." - ხაზი გაუსვა ტრამპმა.

სტრიქონებს შორის: გარდა ამისა, ტრამპმა ამერიკის მოკავშირეებს მოუწოდა, ერთობლივად მოახდინონ ირანული საფრთხის იზოლირება და დამარცხება, ხოლო გამოცხადებულ ზომებს "ეკონომიკური 'D-Day'" უწოდა.

• ტრამპმა ოთხშაბათს, 12 აგვისტოს, განაცხადა, რომ შეერთებული შტატები სრულად აკონტროლებს ჰორმუზის სრუტეს.
• მანამდე მან განაცხადა, რომ ამერიკელმა სამხედროებმა თითქოს გაწმინდეს ჰორმუზის სრუტე ნაღმებისგან და მას "100%-ით" აკონტროლებენ. ამის შემდეგ, ირანის ცენტრალურ სამხედრო სარდლობაში უარყვეს ამერიკის პრეზიდენტის განცხადებები.

დიდი სურათი: სამშაბათს არაბთა გაერთიანებულმა საამიროებმა ირანი მისი მიმართულებით რაკეტების გაშვებაში დაადანაშაულა, რაც მაისის შემდეგ პირველი მსგავსი თავდასხმაა. ირანის საგარეო საქმეთა სამინისტრომ თავდასხმა უარყო.

• არაბთა გაერთიანებული საამიროების თავდაცვის სამინისტრომ ადგილობრივი დროით დაახლოებით 21:00 საათზე X-ზე გამოქვეყნებულ პოსტში განაცხადა, რომ "დააფიქსირა ირანიდან ქვეყნის მიმართულებით გაშვებული ორი ბალისტიკური რაკეტა."
• სამშაბათის ინციდენტს წინ უძღოდა ბოლო რამდენიმე დღის განმავლობაში ჰორმუზის სრუტეში არაბთა გაერთიანებული საამიროების გემებზე თავდასხმები.