ახალი ამბები

აშშ-ის პრეზიდენტი დონალდ ტრამპი უკრაინას რუსეთის დიზელის გადამამუშავებელ საწარმოებზე დარტყმების შეჩერებას სთხოვს.

ტრამპი სწორედ ამ იერიშებს ადანაშაულებს აშშ-ში საწვავის ფასების ისტორიულ მაქსიმუმამდე ზრდაში, რაც კრიტიკულ შუალედურ არჩევნებამდე რამდენიმე კვირით ადრე მისთვის მთავარ პოლიტიკურ გამოწვევად იქცა.

ვითარების არსი: ირლანდიაში ჟურნალისტებთან საუბრისას ტრამპმა განაცხადა, რომ მისმა ადმინისტრაციამ ვოლოდიმირ ზელენსკისთან რუსულ ობიექტებზე დრონებით თავდასხმების შეწყვეტის საკითხი უკვე განიხილა.

• „ბატონმა ზელენსკიმ ერთი რამ უნდა გააკეთოს: შეწყვიტოს რუსეთში დიზელის საწვავის განადგურება. სხვა სამიზნეებს დაარტყას, ოღონდ არა დიზელს, რადგან ის დეფიციტს ქმნის“, - აღნიშნა ტრამპმა.

• პრეზიდენტის მტკიცებით, ფასების ზრდა არა ირანში მიმდინარე ომის, არამედ უშუალოდ რუსეთ-უკრაინის ფრონტზე განვითარებული მოვლენების ბრალია.

რატომ არის მნიშვნელოვანი: დიზელის ფასმა აშშ-ში პირველად გადააჭარბა 6 დოლარს გალონზე და რეკორდულ 6.20 დოლარს მიაღწია.

• დიზელის გაძვირებამ ტრანსპორტირების ხარჯები გაზარდა, რის გამოც წლიური ინფლაცია 3.4%-ზე შენარჩუნდა.
• ეს ზრდის მოლოდინს, რომ ფედერალური რეზერვი საპროცენტო განაკვეთებს კვლავ გაზრდის.
• მზარდი ინფლაცია ტრამპის რეიტინგზე უარყოფითად აისახება - Financial Times-ის ბოლო გამოკითხვით, მის საქმიანობას ამომრჩეველთა მხოლოდ 33% იწონებს, კონგრესის საკონტროლო შუალედურ არჩევნებამდე კი სულ რამდენიმე კვირა რჩება.

კონტექსტი: FT-ის თანახმად, კრიზისს ორივე კონფლიქტი ერთდროულად ამწვავებს: თებერვალში აშშ-ისა და ისრაელის მიერ ირანზე დაწყებული იერიშების შემდეგ დიზელის ფასი თითქმის ორი მესამედით გაიზარდა, რასაც ჰორმუზის სრუტის დე-ფაქტო ჩაკეტვა და ნედლ ნავთობზე ფასის $104-მდე ნახტომი მოჰყვა.

• პარალელურად, რუსულ ნავთობგადამამუშავებელ ქარხნებზე უკრაინული დრონების სისტემურმა თავდასხმებმა მოსკოვს ექსპორტის შეზღუდვა აიძულა, რამაც გლობალურ ბაზარზე დეფიციტი კიდევ უფრო გააღრმავა.

• ამერიკული ქარხნები სრული დატვირთვით მუშაობენ დანაკლისის შესავსებად, თუმცა მარაგების ამოწურვის გამო ამ ტემპის შენარჩუნება სულ უფრო რთულდება.