ახალი ამბები

უკრაინის ქალაქი კონსტანტინოვკა, რომელიც დონეცკის რეგიონში დარჩენილი აგლომერაციიდან ერთ-ერთი ქალაქია, პრაქტიკულად „ნაცრისფერ ზონაში“ აღმოჩნდა, რომელსაც სრულად ვერც რუსული და ვერც უკრაინული არმია ვერ აკონტროლებს.

რას ამბობენ წყაროები და რა ხდება ადგილზე:

• BlackBird (ანალიტიკური პროექტი): მათი მონაცემებით, უკრაინის სრული კონტროლის ქვეშ ქალაქის ცენტრში მხოლოდ რამდენიმე კვარტალი და ჩრდილო-დასავლეთის მცირე ნაწილი რჩება, რომლებიც მთლიანად „ნაცრისფერი ზონითაა“ გარშემორტყმული.
  

• უკრაინელი სამხედროები (BBC-ისთან საუბარში): ადასტურებენ, რომ სამხრეთიდან და აღმოსავლეთიდან რუსი ქვეითები ქალაქის ჩრდილოეთ გარეუბნებშიც კი დააფიქსირეს. თუმცა, მათი თქმით, ეს ოკუპაციას არ ნიშნავს: „ის, რომ ქვეითებმა ნახევარი ქალაქი გაიარეს, კონტროლს არ ნიშნავს - ჩვენ მათ ვანადგურებთ. სწორედ ამიტომაა მთელი კონსტანტინოვკა დღეს "ნაცრისფერ ზონაში“. ქალაქში რჩებიან უკრაინული მოიერიშე ჯგუფები და დრონების ოპერატორები, თუმცა მტერი მათ პოზიციებს სულ უფრო ხშირად აფიქსირებს და უტევს.

• DeepState და ISW (ომის შესწავლის ინსტიტუტი): აფიქსირებენ „ნაცრისფერი ზონის“ გაფართოებას, თუმცა აღნიშნავენ, რომ ბოლო პერიოდში ამ მიმართულებაზე რუსული შეტევის ტემპი შესამჩნევად დაჩქარდა.

• Playfra (OSINT-პროექტი): ვითარებას უკიდურესად მძიმედ აფასებს და წერს, რომ არსებობს განცდა, თითქოს „გარდაუვალი შედეგის მხოლოდ გადავადებაა შესაძლებელი“. მათი თქმით, ქალაქის შენარჩუნების თეორიული შანსი არსებობს, მაგრამ ეს იმდენად დიდ ძალისხმევას მოითხოვს, რომ შესაძლოა აზრიც არ ჰქონდეს.

• CIT-ის ანალიტიკოსი (ანონიმურად): ადასტურებს მძიმე მდგომარეობას და განმარტავს, რომ რუსული ძალები წინ მიიწევენ ქალაქის ცენტრში და ფლანგებიდან ჩრდილოეთ ნაწილის ალყაში მოქცევას ცდილობენ.

კონტექსტი: კონსტანტინოვკისთვის ბრძოლა ომის ერთ-ერთ უმსხვილეს შეტაკებად იქცა. ეს ქალაქი დონბასის თავდაცვის სარტყლისა და რეგიონში უკანასკნელი მსხვილი გამაგრებული ხაზის ერთ-ერთი ნაწილია.

• ანალიტიკოსების შეფასებით, კონსტანტინოვკის დაკარგვა პოკროვსკის დაცემის ტოლფასია - ის გახდება რუსული ჯარების თავმოყრის ახალი პლაცდარმი, საიდანაც ოკუპანტები პირდაპირ 15 კილომეტრში მდებარე მომდევნო დიდ ქალაქზე, დრუჟკოვკაზე, მიიტანენ იერიშს.