ახალი ამბები

უკრაინაში ბრძოლის ველზე მოსკოვის წარუმატებლობის ფონზე, კრემლი ცდილობს, თავისი უახლოესი მოკავშირე აიძულოს, ნეიტრალიტეტი დაარღვიოს და კონფლიქტში ჩაებას.

ინფორმაციას ამის შესახებ გამოცემა The Wall Street Journal საკუთარ წყაროებზე დაყრდნობით ავრცელებს.

ვითარების არსი: გამოცემის შეფასებით, ვარშავის პოლიტიკური წრეებისა და სამხედრო ანალიტიკოსების დაკვირვება აჩვენებს, რომ ბელარუსი დასავლეთსა და კრემლს შორის დაპირისპირების ახალ პოტენციურ ფრონტად იქცა.

• მოსკოვი მინსკთან სამხედრო კავშირის მაქსიმალურ გაძლიერებას ცდილობს, რის გამოც უკრაინა უკვე ღიად იმუქრება ბელარუსის ტერიტორიაზე არსებულ სამხედრო ობიექტებზე დარტყმებით.
• საუბარია ბელარუს-უკრაინის საზღვრის გასწვრივ განთავსებულ სამხედრო აპარატურაზე, რომელსაც რუსეთი უკრაინაზე თავდასხმების კორექტირებისთვის იყენებს
• უკრაინის პრეზიდენტმა ლუკაშენკოს ამ აპარატურის გასათიშად ერთკვირიანი ვადა მისცა, წინააღმდეგ შემთხვევაში კი აღნიშნა, რომ „ამას თავად ისინი გააკეთებენ“.

სიღრმისეულად: რუსეთისა და ევროპის მოქმედი თუ ყოფილი მაღალჩინოსნები The Wall Street Journal-თან საუბარში ადასტურებენ, რომ მიმდინარე წლის დასაწყისში მოსკოვმა ბელარუსზე ინტენსიური ზეწოლის კამპანია დაიწყო.

• კრემლის მიზანია, ქვეყანა პლაცდარმად გამოიყენოს უკრაინაში ომის მასშტაბების გასაფართოებლად ან ნატო-ს წევრი მეზობელი ქვეყნების წინააღმდეგ არაკონვენციური, ჰიბრიდული ოპერაციების დასაწყებად.
• როგორც სტატიაშია აღნიშნული, ეს ნაბიჯი მიანიშნებს, რომ ვლადიმერ პუტინი ომის სარისკო ესკალაციას განიხილავს, ვინაიდან რუსული არმია აღმოსავლეთ უკრაინაში წინსვლას ვერ ახერხებს, თავად პუტინი კი ქვეყნის შიგნით მხარდაჭერის კლებას აწყდება.
• გეგმაში საკვანძო როლი სწორედ ბელარუსს ენიჭება, სადაც მოსკოვმა ტაქტიკური ბირთვული იარაღი განათავსა.

კულისებს მიღმა: გამოცემა ყურადღებას ამახვილებს გასულ თვეში გამართულ საიდუმლო დიპლომატიურ კავშირებზეც. ლუკაშენკომ განაცხადა, რომ საფრანგეთის პრეზიდენტმა ემანუელ მაკრონმა 90-წუთიანი სატელეფონო საუბრისას პირდაპირ გააფრთხილა მინსკი, არ გაზარდოს ომში ჩართულობა.

• მაკრონის ადმინისტრაციამ WSJ-თან დაადასტურა ეს ზარი და აღნიშნა, რომ პარიზმა მკაფიოდ მიუთითა იმ მძიმე რისკებზე, რაც ბელარუსს რუსეთის აგრესიულ ომში ღიად ჩაბმის შემთხვევაში ელის.

რა სურს რუსეთს: მიუხედავად ლუკაშენკოს მანევრირებისა, The Wall Street Journal აქვეყნებს კონკრეტულ ფაქტებს, თუ როგორ იყენებს რუსეთი ბელარუსს მიმდინარე ეტაპზე:

• უკრაინის მიერ რუსულ ნავთობგადამამუშავებელ ქარხნებზე მიტანილი იერიშების გამო, რუსეთში საწვავის დეფიციტი შეიქმნა, რასაც მოსკოვი ბელარუსიდან შესყიდული ბენზინით ფარავს.

• მოსკოვი სულ უფრო ხშირად იყენებს ბელარუსის ტერიტორიაზე არსებულ უპილოტო საფრენი აპარატების სახმელეთო სადგურებს უკრაინის სიღრმეში დრონების იერიშბის დასაკორექტირებლად.

• ამჟამად ქვეყანაში 2000-მდე რუსი სამხედროა დისლოცირებული.

• რუსეთის დაზვერვის ყოფილმა ოფიცერმა გამოცემას დაუდასტურა, რომ კრემლი მინსკს იმ ფინანსური სუბსიდიების შეწყვეტით ემუქრება, რომლებზეც ბელარუსის ეკონომიკაა დამოკიდებული. მოლაპარაკებებს ძირითადად ლუკაშენკო და რუსეთის ელჩი ბორის გრიზლოვი აწარმოებენ.

კიევის პოზიცია: ბელარუსის ეს ნაბიჯები უკვე გახდა უკრაინის სამიზნე. ვოლოდიმირ ზელენსკიმ განაცხადა, რომ კიევმა მოიპოვა ინფორმაცია კრემლის გეგმებზე, რომელიც ბელარუსის პლაცდარმიდან სამხრეთ უკრაინაზე ან ჩრდილოეთით - ბალტიისპირეთის ქვეყნებზე თავდასხმას განიხილავს.

• ზელენსკიმ მკაცრად გააფრთხილა მინსკი, რომ თუ უპილოტო აპარატების მართვის სახმელეთო სადგურების მუშაობა არ შეწყდება, უკრაინა მათ სამხედრო იერიშით გაანადგურებს: „თუ ლუკაშენკო არ გააუქმებს ამ სადგურებს, ჩვენ ყველაფერს გავანადგურებთ“.

პროგნოზები: ამერიკული გამოცემის დასკვნით, ამ ეტაპზე არ არსებობს ნიშნები, რომ რუსეთი უახლოეს დღეებში აპირებს ბელარუსიდან ფართომასშტაბიანი სამხედრო ოპერაციის დაწყებას, თუმცა ეს სცენარი მაგიდაზე დევს.

• WSJ-ის წყაროების თქმით, კრემლის შემდგომი ნაბიჯი შესაძლოა არ იყოს კონვენციური სამხედრო თავდასხმა; ის სავარაუდოდ მიზნად ისახავს ნატო-ს თავდაცვისუნარიანობის გამოცდას ან უკრაინის დასავლელი პარტნიორების დემორალიზებას, როგორც ეს გასულ ზაფხულს მოხდა, როდესაც ბელარუსიდან პოლონეთის საჰაერო სივრცეში რუსული დრონები შეიჭრნენ.

კონტექსტი: 2022 წლის თავდაპირველი შეჭრის შემდეგ, ბელარუსი დიდწილად შორს იჭერდა თავს კონფლიქტისგან და, როგორც სტატიიდან ირკვევა, დასავლეთთან კულუარულ ვაჭრობასაც ცდილობდა.

• WSJ წერს, რომ ამერიკელი მაღალჩინოსნები გასულ წელს ფარულად ეწვივნენ მინსკს, რის შემდეგაც ვაშინგტონმა ნაწილობრივ გააუქმა სანქციები ბელარუსულ კალიუმზე, ლუკაშენკომ კი, სანაცვლოდ, 500-მდე პოლიტპატიმარი გაათავისუფლა.
• ანალიტიკოსების შეფასებით, ომში პირდაპირი ჩართვა ლუკაშენკოს მთავარ სტრატეგიულ მიზანს - დასავლეთთან ეკონომიკური კავშირების აღდგენას ეწინააღმდეგება.