ახალი ამბები

უკრაინის პრეზიდენტის ვოლოდიმირ ზელენსკის განცხადებით, უკრაინულმა ძალებმა წლის დასაწყისიდან რუსული ოკუპაციისგან „590 კვადრატული კილომეტრი“ ტერიტორია გაათავისუფლეს.

რატომ არის ეს მნიშვნელოვანი: ზელენსკის განცხადება იმ ფონზე გაკეთდა, როდესაც უკრაინა რუსეთის ენერგეტიკულ ინფრასტრუქტურაზე შორი მოქმედების იერიშებს აგრძელებს და დასავლეთის მხრიდან დამატებითი მხარდაჭერის კონსოლიდაციას ცდილობს.

რა თქვა ზელენსკიმ: ყოველდღიურ ვიდეომიმართვაში უკრაინის პრეზიდენტმა აღნიშნა, რომ ბოლო 24 საათში უკრაინამ იერიში მიიტანა იაროსლავლის ნავთობგადამამუშავებელ ქარხანაზე: ობიექტზე, რომელიც უკრაინის საზღვრიდან დაახლოებით 700 კილომეტრით არის დაშორებული.

ტენდენცია აშკარად არ არის ოკუპანტის სასარგებლოდ

ზელენსკის თქმით, უკრაინული არმია განსაკუთრებით ეფექტიანად მოქმედებს საჰაერო-სადესანტო და შეტევითი დანაყოფების მიმართულებით. მისივე შეფასებით, რუსეთის მზარდი დანაკარგები და დასავლური სანქციები მოსკოვს „დიპლომატიისკენ უბიძგებს“.

დიპლომატიური ფრონტი: ზელენსკიმ ასევე დაადასტურა, რომ „E3-Ukraine“ ფორმატში სატელეფონო საუბარი ჰქონდა ბრიტანეთის პრემიერ-მინისტრ კირ სტარმერთან, საფრანგეთის პრეზიდენტ ემანუელ მაკრონთან და გერმანიის კანცლერ ფრიდრიხ მერცთან.

პარალელურად  უკრაინის პრეზიდენტი რივნეს ოლქში ჩავიდა, სადაც რივნეს, ჟიტომირისა და ვოლინის რეგიონების წარმომადგენლებს შეხვდა. შეხვედრის მთავარი თემა ჩრდილოეთ უკრაინის თავდაცვის გაძლიერება იყო.

თავის მხრივ, კრემლი კიევს ადანაშაულებს ლუჰანსკის ოლქში კოლეჯის დაბომბვაში, თუმცა უკრაინული მხარე აცხადებს, რომ სამოქალაქო ობიექტები მიზანში არ ამოუღია