ახალი ამბები

უკრაინის პრეზიდენტმა ვოლოდიმირ ზელენსკიმ განაცხადა, რომ სრულმასშტაბიანი ომის დროს არჩევნების ჩატარება დიდ რისკებთან არის დაკავშირებული და შესაძლოა საზოგადოებაში განხეთქილება გამოიწვიოს. 

ვითარების არსი: უკრაინის პრეზიდენტის თქმით, დაახლოებით ერთი წლის წინ უკრაინას სხვადასხვა მხრიდან მოუწოდებდნენ ომის დროს არჩევნების ჩატარებისკენ.

• "ჩემი პოზიცია მკაფიო იყო - თუ პარტნიორები შემოგვთავაზებენ კონკრეტულ პირობებს, რომელთა დროსაც შესაძლებელი იქნება უსაფრთხოდ, ლეგიტიმურად და დემოკრატიულად არჩევნების ჩატარება უკრაინაში - სამხედროების მონაწილეობით, ფრონტისპირა ტერიტორიებზე, საზღვარგარეთ, სადაც ომისგან თავის დაღწევის მიზნით მილიონობით ჩვენი მოქალაქე წავიდა, უსაფრთხოდ - ანუ დარტყმებისა და დაბომბვების გარეშე, მაშინ მოდით განვიხილოთ ეს." - ხაზი გაუსვა მან.

სტრიქონებს შორის: ზელენსკიმ აღნიშნა, რომ მაშინ არცერთ დასავლელ პარტნიორს არ შეუთავაზებია კონკრეტული პირობები, რომლებიც არჩევნების ჩატარების უსაფრთხოების გარანტიას უზრუნველყოფდა. ამავდროულად, მისი თქმით, ეს შეუძლებელია მანამ, სანამ რუსეთის ლიდერი ვლადიმერ პუტინი ცეცხლის შეწყვეტას არ დათანხმდება.

• "მიმაჩნია, რომ ასეთი ომის პირობებში არჩევნები ზოგადად დიდი რისკია. არჩევნები სწორედ ახლა - ეს არის ცუნამი სახელმწიფოსთვის, რომელიც უკრაინას გახლეჩს. ამიტომ ჩემი სტრატეგიაა მივიყვანო ქვეყანა ომის დასრულებამდე და შევინარჩუნო დამოუკიდებელი და სუვერენული სახელმწიფო. და მე მას ვასრულებ." - თქვა მან.
  

დიდი სურათი: გასულ წელს ზელენსკიმ განაცხადა, რომ მზად არის არ იყაროს კენჭი კიდევ ერთი საპრეზიდენტო ვადით, თუ რუსეთთან ომის დასრულება მოხერხდება.

• უკრაინის ყოფილმა თავდაცვის მინისტრმა მიხაილო ფედოროვმა 18 აგვისტოს განაცხადა, რომ არ უნდა დაუშვან, რომ რუსეთმა განსაზღვროს, როდის შეძლებენ უკრაინელები კვლავ საკუთარი ხელისუფლების არჩევას.
• ფედოროვის თქმით, უკრაინამ უნდა იპოვოს კანონიერი, უსაფრთხო და რეალისტური მექანიზმი, რომელიც შესაძლებელს გახდის სრულფასოვანი დემოკრატიული პროცესის განახლებას გაჭიანურებული ომის პირობებშიც კი.
• "ეს რთულია. საჭიროა სამხედროებისთვის ხმის მიცემის უფლების უზრუნველყოფა. საზღვარგარეთ მყოფი მილიონობით უკრაინელისთვის. ფრონტისპირა რეგიონებში მყოფი ადამიანებისთვის. საჭიროა საარჩევნო პროცესის უსაფრთხოების, ინსტიტუტების დამოუკიდებლობისა და შედეგისადმი ნდობის უზრუნველყოფა. მაგრამ სირთულე არ ნიშნავს შეუძლებლობას. უკრაინამ უკვე მრავალჯერ გააკეთა ის, რაც მსოფლიოს შეუძლებლად მიაჩნდა." - აღნიშნა მან.

კონტექსტი: უკრაინაში ჰიპოთეტური საპრეზიდენტო არჩევნების პირველ ტურში ხმას მოქმედ პრეზიდენტ ვოლოდიმირ ზელენსკის უკრაინელების 22.3% მისცემდა, ვალერი ზალუჟნის - 14.9%, მიხაილო ფედოროვს - 13.4%. კვლევა სოციოლოგიურმა ჯგუფმა "რეიტინგმა" 20-21 ივლისს ჩაატარა.

• უკრაინელების 7.2% უჭერს მხარს პრეზიდენტის ადმინისტრაციის უფროს კირილო ბუდანოვს, მოკრივე ოლექსანდრ უსიკი - 5.9%, უკრაინის ყოფილი პრეზიდენტი პეტრო პოროშენკო - 4.6%, ხარკივის მერი იგორ ტერეხოვი - 4.3%, პარლამენტის ყოფილი სპიკერი დმიტრო რაზუმკოვი - 3.7% და მესამე საარმიო კორპუსის მეთაური, გენერალი ანდრიი ბილეცკი - 2.3%.