ახალი ამბები

აზერბაიჯანმა და სომხეთმა დაასრულეს მოლაპარაკებები სამშვიდობო შეთანხმების ტექსტზე.

ამის შესახებ ადგილობრივ ჟურნალისტებს აზერბაიჯანის საგარეო საქმეთა მინისტრმა ჯეიჰუნ ბაირამოვმა განუცხადა.

საგარეო საქმეთა მინისტრმა აღნიშნა, რომ სომხეთმა მიიღო აზერბაიჯანული მხარის წინადადებები შეთანხმების ბოლო ორ არაკოორდინირებულ პუნქტთან დაკავშირებით.

"შემდეგ ეტაპზე ბაქოს მოლოდინები ასეთია: სომხეთმა უნდა შეცვალოს კონსტიტუცია, რომელიც ჯერ კიდევ შეიცავს ტერიტორიულ პრეტენზიებს აზერბაიჯანის მიმართ," - ციტირებს მინისტრის განცხადებას report.az.

მხარეებმა ერევანსა და ბაქოს შორის გასულ წელს განხილული დოკუმენტის 17 პუნქტიდან 15-ზე შეთანხმება მოახერხეს.

მაშინ სომხეთის ხელისუფლებამ აზერბაიჯანს შესთავაზა სამშვიდობო შეთანხმების ხელმოწერა შეთანხმებულ მუხლებზე დაყრდნობით და საკამათო საკითხების სამომავლოდ განხილვა. ბაქომ ამაზე უარი თქვა და მხარეებმა შეუთანხმებელ პუნქტებზე გააგრძელეს მუშაობა.

ორი შეუთანხმებელი პუნქტიდან ერთია საერთაშორისო სასამართლოდან სარჩელის გაწვევა, მეორე კი საზღვარზე მესამე სახელმწიფოს ძალების დისლოცირებაზე უარი. ორივე პუნქტი ბაქოს მიერ იყო შემოთავაზებული სამშვიდობო შეთანხმების პროექტში.

მანამდე პრემიერ-მინისტრმა ფაშინიანმა განაცხადა, რომ სომხეთი მზად არის გაიყვანოს მესამე ქვეყნების წარმომადგენლები საზღვრის დემარკირებული მონაკვეთებიდან და მიიჩნია, რომ სამშვიდობო შეთანხმების ხელმოწერის შემდეგ პრეტენზიების უკან წაღება მისაღებია, მაგრამ იმ პირობით, რომ მოგვიანებით მხარეებმა არ უნდა გამოიყენონ იგივე საკითხები ესკალაციის წყაროდ.

სომხეთის საგარეო საქმეთა სამინისტრომ განაცხადა, რომ სამშვიდობო შეთანხმება მზადაა ხელმოწერისთვის: "სომხეთის რესპუბლიკა მზადაა დაიწყოს კონსულტაციები აზერბაიჯანის რესპუბლიკასთან შეთანხმების ხელმოწერის დროისა და ადგილის შესახებ."