ახალი ამბები

ამერიკის შეერთებული შტატების სახელმწიფო მდივნის თქმით, ომის დასრულების შემდეგ წარმატებული უკრაინა ნიშნავს ძლიერ სახელმწიფოს, როგორც პოლიტიკურად, ასევე ეკონომიკურად ძლიერი დემოკრატიით. 

ამის შესახებ ენტონი ბლინკენმა Brookings institution-ში გამართულ კონფერენციაზე გამოსვლისას განაცხადა. 

მოდერატორის კითხვაზე თუ რას ნიშნავს აშშ-სთვის უკრაინის გამარჯვება და რას აიღებს საკუთარ თავზე ნატო ამ გამარჯვების უზრუნველსაყოფად ბლინკენმა განაცხადა, რომ ამ საკითხზე ადმინისტრაციას მკაფიო ხედვა აქვს. 

"ეს არის ძლიერი, წარმატებული უკრაინაა, რომელიც სულ უფრო მეტად ინტეგრირდება დასავლეთში, რომელიც მყარად დგას ფეხზე როგორც პოლიტიკურ, ასევე ეკონომიკურ და სამხედრო ჭრილში"- თქვა ბლინკენმა. 

სახელმწიფო მდივნის თქმით, აშშ სწორედ მიზნისკენ მიმავალ პოლიტიკას ატარებს. ბლინკენმა აღნიშნა, რომ ევროკავშირში გაწევრიანების შესახებ დაწყებული მოლაპარაკებები არის იმის საუკეთესო გარანტია, რომ ქვეყანა გააგრძელებს აუცილებელ ლიდერებს. 

კონტექსტი 

27 ივნისს New York Times საკუთარ წყაროებზე დაყრდნობით წერდა, რომ 9-11 ივლისს ნატოს საიუბილეო სამიტზე ალიანსი უკრაინის დახმარების ერთიანი ცენტრის შექმნის შესახებ გამოაცხადებს. 

ნიციტიავი გულისხმობს უკრაინის სამხედრო დახმარების ყველა არსებული ფორმატის ინტეგრირებს ერთიან ცენტრში. ამასთანავე ინიციატივის ავტორები მიიჩნევენ, რომ ამგვარი ცენტრის შექმნა გაგზავნის მკაფიო სიგნალს როგორც უკრაინის, ასევე რუსეთის მიმართ, რომ დასავლეთი არ შეწყვეტს უკრაინის დახმარებას. 

რეგლამენტის მიხედვით, ცენტრი უშუალოდ ალიანსის ხელმძღვანელობას დაექვემდებარება რაც იმას ნიშნავს, რომ ნატოს მიმართ სკეპტიკურად განწყობილ დონალდ ტრამპს ნოემბრის არჩევნებში გამარჯვების შემთხვევაშიც არ შეეძლება მისი მარტივად ჩამოშლა. 

გაზეთის წყაროები ამბობენ, რომ უკრაინის დახმარების ძალისხმევის "ტრამპ-გამძლე" ფორმატში გადაყვანა ერთიანი ცენტრის იდეის ავტორების ერთ-ერთი მთავარი მიზანი იყო. 

გერმანიაში ერთიანი ცენტრის იდეა აშშ-სა და ალიანსის წევრი სხვა სახელმწიფოების ლიდერები მას შემდეგ გაუჩნდათ, რაც გასაგები გახდა, რომ ამ დროისთვის უკრაინის ალიანსში გაწევრიანების საკითხზე კონსენსუსი არ არსებობს. მიუხედავად იმისა, რომ ახალი შტაბი არ არის უკრაინის მთავარი სურვილი, ეს მაინც წარმოადგენს სოლიდურ კონსენსუსს, რომელიც სამიტზე უკრაინისა და ალიანსის მზარდი დააახლოების მთავარი სიმბოლო იქნება. 

დასავლური მედიის ცნობით, უკრაინის ნატოში გაწევრიანების მთავარი მოწინააღმდეგეები ამ დროისთვის აშშ და გერმანია არიან - ბაიდენი და შოლცი მიიჩნევენ, რომ ომის დასრულებამდე ამის გაკეთება შეუძლებელი იქნება. გერმანიისა და აშშ-ს ლიდერები, ასევე მიანიშნებენ სისტემური რეფორმების საჭიროებასა და კორუფციის დონის შემცირებაზე, რაც ალიანსში გასაწევრიანებლად იქნება საჭირო. 

დასავლელი ლიდერების ჩანაფიქრით ახალი ცენტრის იდეამ ნაწილობრივ მაინც უნდა დააკმაყოფილოს ან შეარბილოს ვოლოდიმირ ზელენსკის ხისტი რეაქცია - იმის მსგავსი, რაც უკრაინელმა პრეზიდენტმა გასული წლის ვილნიუსის სამიტზე ღიად და მწვავედ გამოხატა. 

ახალი მისია გააერთიანებს უკრაინის დახმარების არსებულ და თემატურ ფორმატებს, მათ შორის სხვადასხვა შეიარაღებისა და დაუყოვნებლივი საჭიროებების კუთხით. 

გარდა ამისა, ცენტრი გაუწევს კოორდინაციას უკრაინელი სამხედროების წვრთნის პროცესს და ცალკეული ქვეყნების მიერ უკრაინასთან გაფორმებული უსაფრთხოების გარანტიების ხელშეკრულებებით ნაკისრი ვალდებულებების შესრულებას. 

ცენტრის იდეა, უკრაინის დახმარების ძალისხმევის ოპტიმიზაციასა და მოწესრიგებას ისახავს მიზნად - ამ დრომდე უკრაინა დახმარებას ძირითადად ცალკეული ქვეყნებთან შეთანხმებების საფუძველზე, სხვადასხვა მარშრუტებითა და ფორმატებით იღებს. 

წყაროების ცნობით, ვისბადენის სამხედრო ბაზაზე განთავსებული შტაბის სახელი უკრაინის დახმარებისა და წვრთნის ნატოს ცენტრი (შემოკლებით NSATU) იქნება, ხოლო მისი ხელმძღვანელი მაღალი ალბათობით 3-ვარსკვლავიანი ამერიკელი გენერალი იქნება. ჩანაფიქრის მიხედვით, შტაბის უფროსი ევროპაში ამერიკული ჯარების სარდალის, გენერალ კრისტოფერ კავოლის დაქვემდებარებაში იქნება. 

ცენტრის ერთ-ერთი მთავარი მიზანი იქნება თავიდან აირიდოს გართულებები და დუბლიკაცები სხვადასხვა შეიარაღების მიწოდებასთან და საბრძოლო მასალების მიწოდების მარშრუტების კუთხით. 

მოსალოდნელია, რომ შტაბი გაუწევს კოორდინაციას უკრაინელი პილოტების წვრთნისა და სწავლების პროგრამას დასავლური წარმოების სხვადასხვა თვითმფრინავებზე. 

ცნობილია, რომ უკვე თითქმის დასრულებულია 20-მდე უკრაინელი პილოტის წვრთნა ამერიკული წარმოების F-16 ტიპის თვითმფრინავებზე, რომელსაც ქვეყანა დანიისგან, ნიდერლანდების, ნორვეგიისა და ბელგიისგან მიიღებს. მაისში ცნობილი გახდა, რომ უკრაინა მიიღებს ფრანგული წარმოების Mirage-ის ტიპის ფრანგულ თვითმფრინავებსაც. 

პარალელურად გაგრძელდა ე.წ. რამშტაინის ფორმატი, რომელშიც 50-მდეა სამხედრო დონორი სახელმწიფო შედის - ჩანაფიქრის მიხედვით ახალ შტაბსა და რამშტაინის ფორმატს შორის მჭიდრო კოორდინაცია უნდა იყოს. 

გერმანიის წინააღმდეგობის გამო ახალ შტაბს ოფიციალურად არ ექნება მისიის ფორმა. 

ახალი შტაბის შესახებ ჯერჯერობით კომენტარი არ გაუკეთებიათ თეთრ სახლში, თუმცა ცოტა ხნის წინ ბაიდენის მრჩეველმა ეროვნული უსაფრთხოების საკითხებში, ჯეიკ სალივანმა განაცხადა, რომ სამიტზე მიღებული იქნება კონკრეტული ნაბიჯები, რომელიც უკრაინისა და ნატოს მზარდ დაახლოებას დაადასტურებს.