ახალი ამბები

პრეზიდენტმა ტრამპმა ირანთან მოლაპარაკებების ბოლო ვადა გადაავადა და ირანის ენერგეტიკულ ობიექტებზე თავდასხმის მუქარა კიდევ 10 დღით შეაჩერა.

რატომ არის მნიშვნელოვანი: ტრამპის ადმინისტრაციამ შუამავალი ჯგუფის - პაკისტანის, ეგვიპტისა და თურქეთის მეშვეობით - მოითხოვა თეირანისგან, ამ კვირაში გამართონ მაღალი დონის შეხვედრა ომის დასრულების შესახებ აშშ-ის წინადადების განსახილველად.

• ტრამპის მიერ ირანის ენერგეტიკულ ინფრასტრუქტურაზე დარტყმების თავდაპირველი ხუთდღიანი პაუზა შაბათს უნდა ამოწურულიყო.

• დიპლომატიურ მოლაპარაკებებში პროგრესის არარსებობის შემთხვევაში, მკვეთრი სამხედრო ესკალაციის ალბათობა გაიზრდება, განსაკუთრებით მაშინ, თუ ჰორმუზის სრუტე კვლავ ჩაკეტილი დარჩება.

• Axios-ის ინფორმაციით, პენტაგონი მანამდეც ამუშავებდა სამხედრო ვარიანტებს ირანში „საბოლოო დარტყმისთვის“, რაც შეიძლება მოიცავდეს სახმელეთო ძალების ჩართვასა და მასირებულ საჰაერო კამპანიას.

რას ამბობს პრეზიდენტი: „ირანის მთავრობის თხოვნის შესაბამისად, გაცნობებთ, რომ ენერგეტიკული სადგურების განადგურების პერიოდს 10 დღით ვაჩერებ - 2026 წლის 6 აპრილამდე, ორშაბათამდე“, - დაწერა ტრამპმა Truth Social-ზე.

• მან ასევე დასძინა, რომ „მოლაპარაკებები გრძელდება და... ძალიან კარგად მიდის“.

კულუარებში: ტრამპმა ეს განცხადება საფონდო ბირჟის დახურვიდან დაახლოებით 10 წუთში გააკეთა, მას შემდეგ, რაც ბირჟამ ომის პერიოდში ყველაზე ცუდი დღე დააფიქსირა.

ამ პოსტის შემდეგ ნავთობის ფასები სწრაფად დაეცა, თუმცა რამდენიმე წუთში ისევ მკვეთრად მოიმატა - ხუთშაბათს საღამოს Brent-ის ტიპის ნავთობის ფასი ბარელზე 107 დოლარის ფარგლებში მერყეობდა.

მოვლენების განვითარება: თეთრი სახლის წარმომადგენელმა, სტივ ვიტკოფმა, ხუთშაბათს კაბინეტის სხდომაზე განაცხადა, რომ ბოლო დღეებში პაკისტანი, ეგვიპტე და თურქეთი აშშ-ს შუამავლობის წინადადებით დაუკავშირდნენ.

• ვიტკოფის თქმით, აშშ-მა პაკისტანის მეშვეობით ირანს გადასცა „15-პუნქტიანი სამოქმედო გეგმა, რომელიც სამშვიდობო შეთანხმების ჩარჩოს წარმოადგენს“.

არსებული ვითარება: გამოცემა Axios-ს შუამავლობის პროცესში ჩართულმა წყარომ განუცხადა, რომ მიუხედავად აშშ-ის წინადადების საჯაროდ უარყოფისა, ირანელმა ოფიციალურმა პირებმა მკაფიოდ განაცხადეს, რომ მოლაპარაკებებით დაინტერესებულნი არიან.

ამავდროულად, ირანის მხარეს ჯერ კიდევ არ მიუცია საბოლოო პასუხი უახლოეს დღეებში აშშ-თან მაღალი დონის შეხვედრის გამართვის შეთავაზებაზე.

Axios-ის თანახმად, შუამავლები თეირანზე ზეწოლას ახდენენ, რათა ის შეხვედრას დათანხმდეს, თუმცა ირანელი მაღალჩინოსნები აცხადებენ, რომ ქვეყნის უმაღლეს ხელმძღვანელობას გადაწყვეტილება ჯერ არ მიუღია.

„შუამავლებისთვის მთავარი საკითხია, რომ ეს შეხვედრა შედგეს. თუმცა მთავარ პრობლემად კვლავ უნდობლობა და ირანელების ეჭვი რჩება, რომ აშშ მათ ისევ ატყუებს“, - აცხადებს წყარო.