ახალი ამბები

აშშ-ის სახელმწიფო მდივნის მოადგილემ, ვიქტორია ნულანდმა რუსეთისთვის პრევენციული სანქციების თემაზე ისაუბრა. 

ნულანდის თქმით, რუსეთისთვის უკრაინაში შეჭრამდე სანქციების დაწესება ნაკლებად ეფექტური იქნება:

"რაც შეეხება სანქციების ამ პაკეტს: შეკავება ყველაზე ეფექტურია მაშინ, როდესაც არსებობს ერთგვარი სტრატეგიული გაურკვევლობა იმასთან დაკავშირებით თუ რა იქნება ჩვენი შემდეგი ნაბიჯი." 

________________________________________

ამ დროისთვის უკრაინაში რუსეთის შეჭრაზე შესაძლო პასუხად ამერიკული ადმინისტრაცია საერთაშორისო ფინანსური სისტემიდან [SWIFT] გათიშვას არ განიხილავს. ინფორმაციას ამის შესახებ Wall Street Journal ავრცელებს. 

გამოცემის მიერ მომზადებული მასალის მიხედვით ბაიდენის ადმინისტრაცია ჯერ კიდევ საპასუხო ზომების განხილვის პროცესშია და ეტაპობრივად ავიწროებს შესაძლო სანქციების არეალს. 

მაღალი ალბათობით, უკრაინაზე თავდასხმის შემთხვევაში სანქციები დაუწესდებათ რუსეთის უმსხვილეს სისტემურ ბანკებს და სახელმწიფო კომპანიებს, რომლებიც რუსეთში სხვადასხვა პროდუქციის შეუფერხებელი იმპორტისთვისაა აუცილებელი. 

ერთ-ერთ საპასუხო ზომად განიხილება რუსეთის მიერ გამოშვებულ ახალ სახელმწიფო ფასიან ქაღალდებზე ოპერაციების აკრძალვა, ამავდროულად განიხილება საექსპორტო კონტროლის დაწესება ისეთ საკვანძო დარგში როგორიცაა - მიკროელექტრონიკა. 

Wall Street Journal-თან საუბარში ბაიდენის ადმინისტრაციის წარმომადგენელი ამბობს, რომ ამ დროისთვის არ განიხილება ისეთი ზომები, როგორებიცაა რუსეთის გათიშვა SWIFT-დან, ასევე არ განიხილება სანქციები საბაზისო ფინანსური ინფრასტრუქტურის წინააღმდეგ, რომლის გარეშეც საბანკო გადარიცხვები პრაქტიკულად შეუძლებელია. 

გარდა ამისა, არ განიხილება სანქციების დაწესება ნავთობის და ბუნებრივი აირის ექსპორტზეც. ამავდროულად, ჩინოვნიკის თქმით, აშშ-მ რუსეთთან მიმართებით სანქციების ახალი სტრატეგია აირჩია და უარი თქვა 2014 წლის შემდეგ დამკვიდრებული ეტაპობრივ მიდგომაზე.