ახალი ამბები

პენტაგონმა ირანთან დაკავშირებით არაერთი სამხედრო გეგმა მოამზადა იმ შემთხვევისთვის, თუ პრეზიდენტი დონალდ ტრამპი ამ ქვეყანაზე დარტყმების განახლების გადაწყვეტილებას მიიღებს.

ვითარების არსი: CNN-ის ცნობით, 16 მაისს ტრამპი ეროვნული უსაფრთხოების საკითხებში მაღალჩინოსნებს შეხვდა ირანის მიმართ შემდგომი მოქმედებების განსახილველად.

• მომდევნო დღეს მან განაცხადა, რომ თეირანისთვის "უმჯობესია იჩქაროს, თანაც რაც შეიძლება მალე, წინააღმდეგ შემთხვევაში მისგან არაფერი დარჩება."
• CNN-ის წყაროს ცნობით, ვირჯინიაში, ტრამპის გოლფ-კლუბში გამართულ შეხვედრას ესწრებოდნენ ვიცე-პრეზიდენტი ჯეი დი ვენსი, სახელმწიფო მდივანი მარკო რუბიო, ცენტრალური სადაზვერვო სააგენტოს დირექტორი ჯონ რეტკლიფი და სპეციალური წარმომადგენელი სტივ უიტკოფი.
• ტელეკომპანია ხაზს უსვამს, რომ ტრამპი სულ უფრო მეტად კარგავს მოთმინებას იმის გამო, თუ როგორ აწარმოებს თეირანი მოლაპარაკებებს და უკმაყოფილოა ჰორმუზის სრუტის ხანგრძლივი ჩაკეტვით, ასევე ამის გავლენით ნავთობის მსოფლიო ფასებზე.

სტრიქონებს შორის: თეთრი სახლის რამდენიმე წარმომადგენლის თქმით, ტრამპმა და მისმა გუნდმა ირანის მიმართ შემდგომ ქმედებებზე გადაწყვეტილების მიღება გადადეს, რადგან შემდგომი ნაბიჯების განსაზღვრამდე სურდათ ენახათ, როგორ ჩაივლიდა მოლაპარაკებები ტრამპსა და ჩინეთის ლიდერ სი ძინფინგს შორის.

• ბოლო დროს აშშ-ის პრეზიდენტი უფრო სერიოზულად განიხილავდა ირანში მასშტაბური საბრძოლო ოპერაციების განახლების შესაძლებლობას, რათა აიძულოს ქვეყანა წავიდეს კომპრომისზე და დაასრულოს ომი.
• წყაროების თანახმად, ამ კვირის დასაწყისში ტრამპი ომის განსახილველად ეროვნული უსაფრთხოების თავის გუნდს კვლავ შეხვდება.

დიდი სურათი: რესპონდენტები ამბობენ, რომ პენტაგონმა უკვე მოამზადა სამხედრო სამიზნეების სია იმ შემთხვევისთვის, თუ ტრამპი მაინც გადაწყვეტს თავდასხმების განახლებას. გეგმებში შედის წერტილოვანი დარტყმები ირანის ენერგეტიკისა და ინფრასტრუქტურის ობიექტებზე.

• პენტაგონის ბოლო შეფასებებით, აშშ-ის ომი ირანის წინააღმდეგ ამერიკას უკვე 29 მილიარდ დოლარზე მეტი დაუჯდა – ეს შეფასება იმაზე მეტი აღმოჩნდა, ვიდრე 25 მილიარდი დოლარის, რომელიც მანამდე კონგრესს წარუდგინეს.
• 12 მაისს ტრამპმა გამოთქვა რწმენა, რომ შეძლებს ირანთან შეთანხმების მიღწევას სასურველი პირობებით "მშვიდობიანი ან სხვა გზით."