ახალი ამბები

უკრაინელი სამხედროები დონეცკის რეგიონში ლიმანის მიმართულებით წინ მიიწევენ. ამის შესახებ უკრაინის პრეზიდენტმა ვოლოდიმირ ზელენსკიმ 30 სექტემბერს საღამოს გამოსვლაში ისაუბრა, რომელიც Telegram-ზე გამოქვეყნდა.

"ჩვენი ქვეყნის აღმოსავლეთში გვაქვს მნიშვნელოვანი შედეგები. ამის შესახებ საკმარისი საჯარო ინფორმაციაა. ყველას მოისმინა, რა ხდება ლიმანში, დონეცკის რეგიონში. ეს არის ნაბიჯები, რომლებიც ჩვენთვის ბევრს ნიშნავს", - განაცხადა ზელენსკიმ.

მან მადლობა გადაუხადა უკრაინელ მებრძოლებს "ჩვენი თავდაცვის გეგმის ამ ელემენტის" განხორციელებისთვის და ხაზი გაუსვა, რომ ეს ძალიან მნიშვნელოვანია.

გარდა ამისა, პრეზიდენტმა აღნიშნა უკრაინის შეიარაღებული ძალების მე-10 სამთო-მოიერიშე ბრიგადის და 54-ე ცალკეული მექანიზებული ბრიგადის ჯარისკაცების მოქმედება სევერსკისა და ბახმუტის მიმართულებით, ასევე 214-ე ცალკეული მსროლელი ბატალიონის, სპეციალური ოპერაციების ძალებისა და 103-ე ცალკეული ბრიგადის სამხედროების სიმამაცე იამპოლის განთავისუფლებისთვის.

იამპოლი ქალაქ ლიმანიდან დაახლოებით 17 კილომეტრში მდებარეობს. 

უკანასკნელი ცნობებით უკრაინელ სამხედროებს ქალაქი ლიმანი ალყაში ჰყავთ და იქ სხვადასხვა ცნობებით 2000-დან 5000-მდე რუსი სამხედრო იმყოფება.