ახალი ამბები

ულტრამემარჯვენე პარტია "ალტერნატივა გერმანიისთვის" ლიდერები რუსეთიდან გერმანიაში გაზის იმპორტის აღდგენაზე რუსეთის ხელისუფლების წარმომადგენლებთან შეხვედრას გეგმავენ. ამის შესახებ 18 სექტემბერს სააგენტო Reuters ორ ინფორმირებულ წყაროზე დაყრდნობით წერს.

ვითარების არსი: ამ მონაცემებით, შეხვედრა 2027 წლის გაზაფხულზეა დაგეგმილი. მოსალოდნელია, რომ AfD-ს მხრიდან მასში მონაწილეობას მიიღებენ პარტიის თანათავმჯდომარეები ალის ვაიდელი და ტინო ხრუპალა, ხოლო რუსეთის მხრიდან - კირილ დმიტრიევი.

• "ალტერნატივა გერმანიისთვის" წარმომადგენლებს გავრცელებულ ინფორმაციაზე კომენტარი ჯერ არ გაუკეთებიათ.

სტრიქონებს შორის: Reuters აღნიშნავს, რომ AfD-ს არ აქვს უფლებამოსილება რუსეთიდან გაზის იმპორტი აღადგინოს.

• ენერგეტიკული პოლიტიკა გერმანიის ცენტრალური მთავრობის პრეროგატივაა და ნაკლებადაა მოსალოდნელი, რომ ულტრამემარჯვენეები მის შემადგენლობაში მოხვდნ.
• გამოცემა ხაზს უსვამს, რომ სხვა პოლიტიკური ძალები უარს ამბობენ AfD-სთან კოალიციაში შესვლაზე, რომელიც კონსტიტუციის დაცვის ფედერალურმა უწყებამ 2025 წელს მემარჯვენე-ექსტრემისტულ გაერთიანებად გამოაცხადა.

დიდი სურათი: სააგენტო Reuters-სთან ინტერვიუში, რომელიც 30 ივნისს გამოქვეყნდა, ვაიდელმა რუსულ ნავთობსა და გაზზე ბოიკოტის შეწყვეტა მოითხოვა.

• "იაფი ენერგია რუსეთიდან იყო Made in Germany მარკის წარმატების საიდუმლო. ჩვენ ის უნდა დავიბრუნოთ," - განაცხადა AfD-ს თანათავმჯდომარემ.
• მან მიანიშნა, რომ გერმანიის აღმოსავლეთში ჩატარებულ არჩევნებს კანცლერობისკენ მიმავალ საფეხურებად განიხილავს.
• საქსონია-ანჰალტის პარლამენტის არჩევნებამდე "ალტერნატივა გერმანიისთვის" ამომრჩეველს ჰპირდებოდა ენერგეტიკის სფეროში რუსეთის წინააღმდეგ დაწესებული სანქციების გაუქმებას და "გერმანია-რუსეთის სავაჭრო ურთიერთობების ნორმალიზებას," მათ შორის "ჩრდილოეთის ნაკადის" მილსადენით გაზის შესყიდვის აღდგენას.