ახალი ამბები

რუმინეთის პრეზიდენტმა ნიკუშორ დანმა Financial Times-ს განუცხადა, რომ ბუქარესტი მზადაა, ქვეყანაში ამერიკელი სამხედროების განთავსების ხარჯები ნაწილობრივ დაფაროს, რათა აშშ-მა სამხედრო კონტინგენტი არ შეამციროს.

ვითარების არსი: დანის განცხადებით, რუმინეთმა ვაშინგტონს უკვე შესთავაზა სამხედროების რაოდენობასა და ხარჯების განაწილებასთან დაკავშირებული კონკრეტული წინადადებები.

• "ჩვენ გვინდა მეტი ამერიკელი სამხედრო და უფრო ძლიერი საბრძოლო შესაძლებლობები", - განაცხადა რუმინეთის პრეზიდენტმა.

დეტალებში: ამჟამად რუმინეთში 1,172 ამერიკელი სამხედრო იმყოფება, მაშინ როდესაც ადრე მათი რაოდენობა 1,700-ს შეადგენდა.

• ბუქარესტი პოლონეთის მაგალითს განიხილავს, რომელმაც აშშ-ს თითოეული სამხედრო მოსამსახურის განთავსებისთვის წელიწადში 15,000 დოლარის გადახდა შესთავაზა.

• რუმინეთის პრეზიდენტმა საკუთარი წინადადება აშშ-ის თავდაცვის მდივნის მოადგილეს, ელბრიჯ კოლბისაც გააცნო.

რატომ არის მნიშვნელოვანი: ტრამპის ადმინისტრაცია ევროპაში ამერიკული სამხედრო კონტინგენტის შემცირებას განიხილავს, მაშინ როდესაც რუსეთის დრონები რუმინეთის ტერიტორიაზე არაერთხელ ჩამოვარდნენ.

• დანის განცხადებით, უკრაინაში ომი პირდაპირ საფრთხეს უქმნის რუმინეთის უსაფრთხოებას.

• ბუქარესტს სურს შავი ზღვის რეგიონში თავდაცვის შესაძლებლობების გაძლიერება, თუმცა რუსეთთან ესკალაციის თავიდან აცილებას ცდილობს.

კონტექსტი: რუმინეთში აშშ-ს ორი სტრატეგიულად მნიშვნელოვანი სამხედრო ობიექტი აქვს - მიხაილ კოგელნიჩანუს ავიაბაზა და დევესელუს სარაკეტო თავდაცვის ბაზა.

• რუმინეთის პრეზიდენტის განცხადებით, ქვეყანა თავდაცვის ხარჯებს ეტაპობრივად ზრდის, თუმცა მაღალი საბიუჯეტო დეფიციტის გამო პოლონეთის სამხედრო დანახარჯების დონეს ვერ უახლოვდება.