ახალი ამბები

გასული ივნისის განმავლობაში რუსეთის საოკუპაციო არმიამ უკრაინაში უფრო მეტი ტერიტორია დაკარგა, ვიდრე დაიკავა - სხვაობა 9 კვადრატული კილომეტრია.

ამის შესახებ ფინური OSINT ანალიტიკური ჯგუფის, BlackBird-ის მონაცემები მეტყველებს.

ვითარების არსი: ეს მიმდინარე წელს უკვე მეორე შემთხვევაა, როდესაც თვის განმავლობაში რუსეთი მეტ ტერიტორიას კარგავს, ვიდრე იპყრობს.

• აქამდე ბოლო ასეთი შემთხვევა მიმდინარე წლის თებერვალში დაფიქსირდა. იქამდე კი რუსეთის მიერ კონტროლირებადი ტერიტორიის მოცულობა ბოლოს 2023 წლის ზაფხულში, უკრაინის შეიარაღებული ძალების კონტრიერიშის დროს შემცირდა.

ჩაშლილად: BlackBird-ის მონაცემებით, ცვლილებები უკავშირდება უკრაინული არმიის წარმატებულ კონტრშეტევებს ქალაქ ლიმანის, ანდრიივკა-კლიშჩიივკისა და ჰულაიპოლეს მიმართულებით.

• ანალიტიკოსების შეფასებით, რუსეთის მიერ კონტროლირებადი ტერიტორიის მოცულობის შემცირება ასევე უკავშირდება უკრაინის შეცვლილ ტაქტიკას და ფრონტის ხაზის სიღრმეში ინფილტრაციის გაძლიერებას, რის შედეგადაც საგრძნობლად იზრდება ე.წ. რუხი ზონა - ტერიტორია, რომელზეც არცერთ არმიას არ აქვს ეფექტური კონტროლი.

• ამასთანავე, ფრონტის ცალკეულ მონაკვეთებზე რუსეთის იერიში გრძელდება, მათ შორის ქალაქ კონსტანტინივკისა და კუპიანსკის ირგვლივ.

• უკრაინული წყაროები კონსტანტინივკაში შექმნილ ვითარებას „რთულს“ უწოდებენ. BlackBird-ის ექსპერტების შეფასებით, ქალაქის დიდი ნაწილი ამ დროისთვის რუხ ზონაშია, ხოლო მასზე სრული კონტროლის დამყარებას საოკუპაციო არმია, სავარაუდოდ, ზაფხულის მიწურულს შეძლებს.

• რუსეთის წინაშე არსებული გამოწვევების მიუხედავად, ანალიტიკოსები ელიან, რომ საოკუპაციო არმია კვლავ გააგრძელებს იერიშებს სლოვიანსკისა და კრამატორსკის მიმართულებით, თუმცა მიმდინარე წელს ამ ქალაქების დაკავებას ნაკლებად სავარაუდოდ მიიჩნევენ.

დიდი სურათი: ფრონტზე წინსვლის კლებისა და უკრაინული დრონების დარტყმებით გამოწვეული ეკონომიკური ზიანის ფონზე, ექსპერტების შეფასებით, რუსეთი შესაძლოა კონფლიქტის ესკალაციაზე წავიდეს, თუმცა, მათი აზრით, ამის სივრცე დღითიდღე მცირდება.

• BlackBird-ის შეფასებით, ესკალაციის ფარგლებში რუსეთმა შესაძლოა მობილიზაციის ახალი ტალღა გამოაცხადოს, თუმცა ეს მნიშვნელოვან პოლიტიკურ რისკებთან იქნება დაკავშირებული. ანალიტიკოსების შეფასებით, მინიმალურია რუსეთის მიერ ბირთვული იარაღის გამოყენების შანსიც.
• მათივე შეფასებით, მიმდინარე ტენდენციების გაგრძელებამ კრემლს შესაძლოა რეალური სამშვიდობო მოლაპარაკებების დაწყებისკენ უბიძგოს, თუმცა ამის ნიშნები ჯერჯერობით არ არსებობს.