ახალი ამბები

რუსეთის ციფრული პლატფორმების ასოციაციამ (АЦП), რომელიც აერთიანებს Wildberries-ს, Ozon-ს, Яндекс-ს, Авито-სა და Купер-ს, რუსეთის მთავრობას შესთავაზა მხარდამჭერი ზომების მიღება იმ მეწარმეებისთვის, რომლებიც უკრაინული დრონების შეტევების შედეგად დაზარალდნენ.

ვითარების არსი: Ведомости-ს ცნობით, შესაბამისი წერილი ორგანიზაციამ რუსეთის მთავრობის ხელმძღვანელს, მიხეილ მიშუსტინს 12 აგვისტოს გაუგზავნა.

• ასოციაციის მიერ შეთავაზებული ერთ-ერთი ღონისძიებაა პირდაპირი დახმარება ფედერალური ბიუჯეტიდან. კომპანიები წერენ, რომ ეს მათ საშუალებას მისცემს გააგრძელონ საქმიანობა ჩვეულ მოცულობებში, ასევე შეინარჩუნონ ბიზნესი და სამუშაო ადგილები.
• ასოციაციაში მიიჩნევენ, რომ ასეთი მხარდაჭერა უნდა გაანგარიშდეს კონკრეტული ორგანიზაციის ფაქტობრივი ზარალისა და საქმიანობის მასშტაბის გათვალისწინებით.

სტრიქონებს შორის: გარდა ამისა, დაზარალებული მეწარმეები ითხოვენ გადასახადებისა და სავალდებულო გადახდების გადავადებას ან განვადებას სულ მცირე 6 თვით, აგრეთვე ჯარიმებისა და საურავების დროებით შეჩერებას იმ პერიოდში, როდესაც ისინი ობიექტურად ვერ ახერხებდნენ ნორმალურად მუშაობას.

• The Moscow Times წერს, რომ თანხა, რომელსაც ასოციაცია ითხოვს, ასობით მილიარდ რუბლად ფასდება. კერძოდ, დარტყმების სერიის შემდეგ Wildberries-ის საწყობებში დაიწვა 445-დან 507 მილიარდ რუბლამდე (დაახლოებით 6 მილიარდი დოლარი - რედ.) ღირებულების საქონელი.
• ელექტრონულ პლატფორმებზე ვაჭრობისთვის საქონლის მომწოდებელთა ასოციაცია გამყიდველების დანაკარგებს კიდევ უფრო მეტად - 600-700 მილიარდ რუბლად აფასებს (7-8 მილიარდი დოლარი - რედ.).

დიდი სურათი: ამასთან, თავად Wildberries-მა, რომელმაც საწყობების დაახლოებით მესამედი დაკარგა, DataInsight-ის შეფასებით, 147-223 მილიარდი რუბლის (1.75- 2.65 მილიარდი დოლარი - რედ.) პირდაპირი ზარალი მიიღო.

• ეს თანხა 278 მილიარდ რუბლამდე (3.3 მილიარდი დოლარი - რედ.) იზრდება, თუ გავითვალისწინებთ დემონტაჟს და ნარჩენების გატანასა.
• Wildberries-ზე დარტყმების შემდეგ, ზოგიერთმა რუსულმა მარკეტპლეისმა დაიწყო გამყიდველებისთვის პირობების შეცვლა და უპილოტო საფრენი აპარატების შეტევების დროს საქონლის დაკარგვაზე პასუხისმგებლობის მოხსნა.