ახალი ამბები

უკრაინის პრეზიდენტმა ვოლოდიმირ ზელენსკიმ, სამხედრო დაზვერვის ხელმძღვანელის, ოლეგ ივაშჩენკოს მოხსენებაზე დაყრდნობით, რუსეთის ტერიტორიაზე განხორციელებული მასშტაბური სამხედრო დარტყმების შედეგები და კრემლის საპასუხო საიდუმლო ნაბიჯები გაასაჯაროვა.

ბალტიის ფლოტი: უკრაინული ძალების იერიშის შედეგად, სანქტ-პეტერბურგთან ახლოს მდებარე რუსეთის ბალტიის ფლოტის არსენალში 60 ათას ტონაზე მეტი საბრძოლო მასალა განადგურდა.

• ზელენსკის ინფორმაციით, სამხედრო დაზვერვის ანალიზმა ასევე დაადასტურა რუსული სამხედრო საწარმოების ზუსტი დაზიანება, რომლებიც რუსული არმიისთვის რადიოელექტრონიკასა და სხვა კრიტიკულ კომპონენტებს აწარმოებენ. 

საჰაერო თავდაცვა: უკრაინულმა დაზვერვამ მოიპოვა რუსეთის შიდა დოკუმენტები, სადაც ასახულია უკრაინული დარტყმების რეალური შედეგები და კრემლის რეაგირების გეგმა.

• დოკუმენტების მიხედვით, რუსეთის ხელმძღვანელობამ გასცა ბრძანება, საჰაერო თავდაცვის სისტემები სხვადასხვა რეგიონიდან სასწრაფოდ გადაისროლონ ორად ორ პრიორიტეტულ მიმართულებაზე - მოსკოვსა და ქერჩის (ყირიმის) ხიდზე.
• კრემლი ამ ობიექტების დაცვას სხვა ტერიტორიებისა და უკრაინის ოკუპირებული ზონების საჰაერო თავდაცვის დასუსტების ხარჯზე ახორციელებს.

სტრატეგიული ავიაცია: დაზვერვის მოხსენებაში ცალკე ადგილი დაეთმო რუსული რაკეტების წარმოებისა და სტრატეგიული ავიაციის მდგომარეობის ანალიზს. კიევი ამ მონაცემებზე დაყრდნობით საპასუხო სამხედრო ნაბიჯებს ამზადებს.