რუსეთმა სომხეთიდან თავისი ელჩი კონსულტაციებისთვის გაიწვია
ერევანში რუსეთის ელჩი სერგეი კოპირკინი კონსულტაციებისთვის მოსკოვში დაიბარეს. ამის შესახებ რუსეთის საგარეო საქმეთა სამინისტრომ განაცხადა.
სამინისტროს ოფიციალურმა წარმომადგენელმა მარია ზახაროვამ დეტალები არ დააკონკრეტა.
რუსეთსა და სომხეთს შორის ურთიერთობები 2023 წლიდან მნიშვნელოვნად გაუარესდა.
მოსკოვმა ერევანი გააკრიტიკა, რადგან სომხეთი შეუერთდა სისხლის სამართლის საერთაშორისო სასამართლოს, რომელმაც რუსეთის პრეზიდენტის, ვლადიმერ პუტინის დაპატიმრების ორდერი გასცა. რუსეთი ასევე ეწინააღმდეგებოდა სომხეთის მიერ შეერთებულ შტატებთან ერთად სამხედრო წვრთნების ჩატარებას.
საპირისპიროდ, სომხეთში, რუსეთს მთიანი ყარაბაღის მეორე ომის დროს მხარდაჭერაზე უარის თქმისთვის აკრიტიკებდნენ.
სომხეთის პრემიერ-მინისტრმა ნიკოლ ფაშინიანმა 2024 წლის თებერვალში განაცხადა, რომ სომხეთმა "გაყინა" მონაწილეობა კოლექტიური უსაფრთხოების ხელშეკრულების ორგანიზაციაში (ОДКБ).
მაისში სომხეთმა ОДКБ-ს დაფინანსება შეაჩერა. ამის შემდეგ ფაშინიანმა გამოაცხადა, რომ ОДКБ-ს წევრი ორი ქვეყანა მონაწილეობდა აზერბაიჯანთან ომის მომზადებაში 2020 წელს მთიან ყარაბაღში.
