ახალი ამბები

სამშვიდობო მოლაპარაკებების მორიგი რაუნდის ფარგლებში პრეზიდენტ ტრამპის წარმომადგენლები, სტივ უიტკოფი და ჯარედ კუშნერი 15 დეკემბერს ბერლინში ვოლოდიმირ ზელენსკის და ევროპელ ლიდერებს შეხვდებიან. 

ვითარების არსი: გერმანიაში დაგეგმილი მრავალმხრივი შეხვედრის შესახებ პირველად Wall Street Journal-მა დაწერა. 

• საყურადღებოა, რომ თავდაპირველად შეხვედრა პარიზში 13 დეკემბერს უნდა გამართულიყო, თუმცა წყაროების ცნობით, ტრამპის ადმინისტრაციის უკმაყოფილების გამო გაუქმდა. 
  
  
• ბერლინში გასამართ შეხვედრაში მონაწილეობას მიიღებენ გერმანიის, საფრანგეთისა და გაერთიანებული სამეფოს ლიდერები. 

სტრიქონებს შორის: სავარაუდოა, რომ განხილვის მთავარი თემა ტერიტორიების საკითხი იქნება - კრემლი დონბასის არაოკუპირებული ნაწილიდან უკრაინული ჯარების გაყვანას ითხოვს.

• ტრამპის ადმინისტრაციაში მიაჩნიათ, რომ ომის გაგრძელების შემთხვევაში უკრაინა ისედაც დაკარგავს ამ ტერიტორიების ნაწილს, ან მთლიანად ოლქს - ისინი მოუწოდებენ უკრაინელ პრეზიდენტს მიიღოს შეთანხმება, სანამ პირობები გაუარესდება. 
  
  
• წყაროების ცნობით, თეთრი სახლის ოპტიმიზმი მას შემდეგ გაიზარდა რაც გასულ დღეებში ვოლოდიმირ ზელენსკიმ სამშვიდობო შეთანხმების პირობებზე რეფერენდუმის ჩატარების იდეა გააჟღერა. 

დიდი სურათი: ამასთანავე გასულ დღეებში გაიმართა უიტკოფისა და კუშნერის საუბარი უკრაინის პრეზიდენტის უსაფრთხოების მრჩეველთან, სადაც განიხილებოდა დონბასში ე.წ. დემილიტარიზებული ზონის შექმნა. 

• "ამ მოლაპარაკეკებმა მოგვცა საკმარისი პროგრესი რათა დაერწმუნებინა ტრამპი კუშნერი და უიტკოფი ევროპაში გაეგზავნა"- ამბობს Axios-სთან საუბარში ერთ-ერთი წყარო.