ახალი ამბები

ჩეხეთის თავდაცვის მინისტრმა იანა ჩერნოხოვამ განაცხადა, რომ საბჭოთა წარმოების Mi-24-ის ვერტმფრენები, რომლებსაც ჩეხეთი ამერიკული ვერტმფრენებით ანაცვლებს, შესაძლოა უკრაინას მიაწოდონ.

ამის შესახებ ჩეხური ČTK წერს.

ჩერნოხოვამ ხუთშაბათს ქალაქ ნამეშტ ნად ოსლავის მახლობლად, ჩეხეთის საჰაერო ძალების ვერტმფრენის ბაზაზე გამართულ ღონისძიებაზე აღნიშნა, რომ ჩეხეთი მომავალში არ შეიძლება იყოს "ფინანსურად დამოკიდებული აღმოსავლეთის სარისკო რესურსებზე," ამიტომ მნიშვნელოვანია სამხედრო ტექნიკის განახლება და მისი შეკეთების შესაძლებლობების შექმნა.

ამავდროულად, მან აღნიშნა რუსული Mi-24V და Mi-35 ვერტმფრენების მუშაობა, რომლებიც "მოსალოდნელზე მეტხანს მსახურობდნენ."

"მიუხედავად იმისა, რომ ჩვენ დღეს სიმბოლურად დავემშვიდობებით მათ, მათი ისტორია, რა თქმა უნდა, არ დასრულებულა. ვფიქრობ, ჩვენ ყველანი ვეჭვობთ, რომ მათ დღესაც შეუძლიათ იპოვონ თავიანთი ფუნქცია, სადაც ახლა საჭიროა ნებისმიერი თავდაცვის ტექნიკა. სწორედ აქ მიდის ჩვენი დახმარება მრავალი თვის განმავლობაში და გაგრძელდება." - თქვა ჩეხეთის თავდაცვის მინისტრმა.

მან განაცხადა, რომ ვერტმფრენები კარგ მდგომარეობაშია და დიდი ხანია ასრულებენ დავალებებს ჯარის ინტერესებიდან გამომდინარე, მათ შორის საგარეო ოპერაციებში.

ჩეხეთის არმია 40-მდე ვერტმფრენით არის შეიარაღებული, რომელთაგან 30 საბჭოთა და რუსული წარმოების Mi სერიის ვერტმფრენებია. ჩეხეთს აქვს რამდენიმე Mi-8 და Mi-17 სატრანსპორტო ვერტმფრენი და მათი ექსპლუატაციის ვადა რამდენიმე წელიწადში იწურება. მას ასევე აქვს 15 მოდერნიზებული Mi-171Sh ვერტმფრენი და მათი გამოყენება 2035 წლამდე შეუძლია.