ახალი ამბები

ჩინეთი ნავთობის უკანონო შეძენით ირანს ირიბად ეხმარება იემენელი "ჰუსიტების" დაფინანსებაში. ამის შესახებ Politico დასავლური დაზვერვის წარმომადგენლებზე დაყრდნობით წერს.

"ჩინეთი ირიბად ეხმარება ირანს წითელ ზღვაში გადაზიდვების დაბლოკვაში, აუარესებს გლობალურ სავაჭრო ნაკადებს და აზიანებს საკუთარ ინტერესებს ამ პროცესში," - წერს გამოცემა.

ჩინეთი ირანული ნავთობის დაახლოებით 90 პროცენტს ყიდულობს, მათ შორის ნავთობს, რომელსაც "რევოლუციის გუშაგთა კორპუსი" ყიდის, რომელიც პასუხისმგებელია თეირანის გარე სამხედრო ოპერაციებზე.

"გუშაგთა კორპუსი" წვრთნის და აფინანსებს პრო-ირანულ ძალებს მთელს ახლო აღმოსავლეთში, როგორიცაა "ჰეზბოლა" ლიბანში და "ჰუსიტები" იემენში.

"ჰუსიტები თავს ესხმიან საერთაშორისო მარშრუტებს და პირველი ქვეყანა, რომელიც ამით დაზარალდება, თავად ჩინეთია. დარწმუნებული არ ვარ, რომ ისინი აცნობიერებენ, რომ ჭრიან იმ ტოტს, რომელზეც სხედან," - განუცხადა Politico-ს ერთ-ერთმა წყარომ.

ჩინეთის მთავრობის სპიკერმა გამოცემის თხოვნას კომენტარზე არ უპასუხა.

მიუხედავად იმისა, რომ "ჰუსიტებმა" პირობა დადეს, რომ თავს არ დაესხმებიან ჩინურ გემებს, ამ კვირის დასაწყისში მათ რამდენიმე რაკეტა ესროლეს ჩინურ ხომალდ Huang Pu-ს. გემს, რომელიც რეგისტრირებულია პანამაში, მცირე დაზიანება ჰქონდა. უცნობია იცოდნენ თუ არა "ჰუსიტებმა" გემის წარმოშობის შესახებ.

საერთაშორისო სანქციებმა ირანის რეჟიმი შემოსავლის გარეშე დატოვა. პრო-ირანული ძალების დასაფინანსებლად, ხელისუფლება "რევოლუციის გუშაგთა კორპუსს" ნავთობის წლიურ მოცულობას აწვდის, რომელსაც ჯგუფი საზღვარგარეთ ფრონტ კომპანიების რთული ქსელის მეშვეობით ყიდის.