ახალი ამბები

დონბასელი სეპარატისტების ლიდერებმა საყოველთაო ევაკუაციის გამოცხადების შესახებ ვიდეოები მის გასაჯაროებამდე 2 დღით ადრე ჩაწერეს. ამის შესახებ ინფორმაციას რადიო თავისუფლების რუსული სამსახური ავრცელებს, რომლის ჟურნალისტმა სეპარატისტების მიერ გამოქვეყნებული ვიდეოების მეტამონაცემები შეისწავლეს. 

ევაკუაციის შესახებ განცხადება თვითაღიარებული დონეცკისა და ლუჰანსკის რესპუბლიკების ლიდერებმა დღეს, 18 თებერვალს გამოაცხადეს, თუმცა აღმოჩნდა, რომ ეს ვიდეოები რეალურად 16 თებერვალს არის ჩაწერილი. 

ჩანაწერში დონეცკელი სეპარატისტების ლიდერი, დენის პუშილინი ამბობს, რომ რუსეთი მზად არის მიიღოს ევაკუირებული მოსახლეობა. მიუხედავად ამისა ევაკუაციის გამოცხადების ვიდეოს გასაჯაროების შემდეგ, რუსეთის ხელისუფლებაში ამბობდნენ, რომ მათთვის უცნობია ევაკუაციის გეგმის შესახებ. 

მოგვიანებით ლტოლვილებისთვის საველე ბანაკების მოწყობაზე განაცხადეს როსტოვში, რასაც მალევე რუსეთის პრეზიდენტის განკარგულება მოჰყვა, რომლის მიხედვითაც თითო ევაკუირებულს რუსეთი 10 ათას რუბლს გადაუხდის. 

ჯერჯერობით კვლავ უცნობია თუ რა რაოდენობის ლტოლვილებზეა საუბარი, პუშილინმა რუსეთის სახელმწიფო ტელევიზიასთან ინტერვიუში განაცხადა, რომ საუბარია ასობით ათასზე ადამიანზე. არსებული ინფორმაციით, ამ დროისთვის დონბასში რუსული პასპორტის მქონე 700 ათასამდე ადამიანია. 

უკრაინის შეიარაღებული ძალების მეთაურმა, ვალერი ზალუჟნიმ ოკუპირებული დონბასის მოსახლეობას მიმართა. მისი თქმით, ოკუპანტები მშვიდობიან მოსახლეობას ვითარების ხელოვნური ესკალაციისთვის იყენებენ. 

"მივმართავ დროებით ოკუპირებული ტერიტორიების მოსახლეობას, არ დაუჯეროთ ოკუპანტების ტყუილებს, თქვენ გიყენებენ ვითარების ესკალაციისთვის და მორიგი სისხლისღვრის მოსაწყობად",- განაცხადა მან.

ზალუჟნიმ კიდევ ერთხელ განმარტა, რომ უკრაინა არ განიხილავს არანაირ სამხედრო ოპერაციას დროებით ოკუპირებულ ტერიტორიებზე. შეიარაღებული ჯარების მეთაურმა აღნიშნა ისიც, რომ ბოლო დღეების განმავლობაში ოკუპანტების მხრიდან გახსნილ ცეცხლს უკრაინელები მხოლოდ იმ შემთხვევაში პასუხობენ, თუ საფრთხე ემუქრება ჯარისკაცების სიცოცხლეს. 

როსტოვის გუბერნატორმა, ვასილი გოლუბევმა ვლადიმირ პუტინს მიმართა თხოვნით რუსეთის ფედერაციამ საგანგებო დახმარება აღმოუჩინოს უკრაინის სეპარატისტული რეგიონებიდან ევაკუირებულებს, რომელთა განთავსებაც როსტოვში იგეგმება. 

ამის შესახებ ინფორმაცია დაადასტურა კრემლის პრესსპიკერმა, დმიტრი პესკოვმა.

"რუსეთის პრეზიდენტმა დაავალა მთავრობას, რომ დონბასიდან ჩამოსულ თითო ლტოლვილს გამოეყოს კომპენსაცია 10 ათასი რუბლის ოდენობით." - განაცხადა პესკოვმა. 

________________________________________________

დონეცკის თვითაღიარებული რესპუბლიკის პრეზიდენტმა, დენის პუშილინმა მასობრივი ევაკუაციის დაწყების შესახებ განაცხადა. 

ინფორმაციას ამის შესახებ სეპარატისტების მიერ კონტროლირებადი საინფორმაციო სააგენტო ავრცელებს. 

სეპარატისტების ლიდერის თქმით, ევაკუირებულ მოსახლეობას რუსეთში გადაიყვანენ. პუშილინი ამბობს, რომ პირველ რიგში მოხდება ბავშვების, ქალების და მოხუცების ევაკუაცია - მათ როსტოვში განათავსებენ. 

"ევაკუირებულები უზრუნველყოფილნი იქნებიან ყველანაირი აუცილებელი პირობით. გამშვებ პუნტქებზე ყველაფერი მოწყობილია სწრაფი გადასვლისთვის. მოვუწოდებ მოსახლეობას მიიღონ სწორი გადაწყვეტილება, დროებითი ევაკუაცია გადაარჩენს თქვენს სიცოცხლეს."- ამბობს პუშილინი. 

რუსეთის მიერ მართული სეპარატისტების ლიდერის თქმით, უკრაინის პრეზიდენტი ცოტა ხანში გასცემს ბრძანებას დონბასზე შეტევის დაწყების შესახებ. 

ბოლო დღეების განმავლობაში დასავლური წყაროები ხაზს უსვამენ, რომ რუსეთი უკრაინაში შეჭრის საბაბის შექმნას ცდილობს. მათ შორის საუბარი ვიდეოებსა და სხვა ყალბ ამბებზე, რომელშიც ასახული იქნება თუ როგორც კლავენ ან აწამებენ რუსულენოვან ადამიანებს უკრაინელი სამხედროები. 

ბოლო დღე-ღამის განმავლობაში ეუთოს დამკვირვებლებმა დონბასში 500-ზე მეტი აფეთქება დაითვალეს. პერიოდულად მთელი დღის განმავლობაში სეპარატისტების პოზიციებიდან იბომბებოდა დასახლებული პუნქტებიც. 

მათ შორის საარტილერიო დაბომბვის არეალში მოხვდა 20-ზე მეტი დასახლება, ჭურვები დაეცა საბავშვო ბაღში, რკინიგზის სადგურსა და სკოლა-ლიცეუმი ეზოშიც. 

უკრაინული მხარემ კიდევ ერთხელ მოუწოდა ეუთოს დამკვირვებლებს დარჩნენ ქვეყანაში და დეტალურად აღრიცხონ ცეცხლის შეწყვეტის დარღვევის შემთხვევები. 

უკრაინის საგარეო საქმეთა მინისტრმა, დმიტრი კულებამ მოუწოდა დასავლეთის სახელმწიფოებს მკაფიოდ დაგმონ დონბასში რუსეთის მიერ მართული ესკალაცია. 

ამავე პერიოდში პრეზიდენტმა ზელენსკიმ სრული მზადყოფნა გამოთქვა ნებისმიერ ფორმატში შეხვდეს ვლადიმირ პუტინს, თუმცა კრემლში ამბობენ, რომ ზელენსკისთან შეხვედრისთვის საკმარისი წინაპირობები არ არსებობს.