ახალი ამბები

გერმანიის ტრანსპორტის მინისტრი ფოლკერ ვისინგი აცხადებს, რომ ბერლინი უკრაინელი ლტოლვილების მიღებაზე რაოდენობრივ შეზღუდვას არ დააწესებს.

„გერმანია უკრაინელ ლტოლვილებს ვერ და არ გააბრუნებს“, - განაცხადა ვისინგმა, რომელიც ლიბერალური თავისუფალი დემოკრატების (FDP) რიგებიდანაა.

მინისტრის თქმით, ბერლინი ყველაფერს აკეთებს მიგრანტების პოლონეთიდან გერმანიაში უსაფრთხოდ გადმოსაყვანად.

მიგრანტების მიღება-დაბინავების ცენტრები ჰანოვერში, კოტბუსსა და ბერლინშია გახსნილი.

24 თებერვალს რუსეთის მიერ ომის დაწყების შემდეგ უკრაინა 5 მილიონზე მეტმა მიგრანტმა დატოვა.

ყველაზე მეტი ლტოლვილი მეზობელ პოლონეთში გადადის. ვარშავას ყოველდღიურად 120 000-ზე მეტი მიგრანტის მიღება უწევს.

გერმანიის პოლიციის გამოქვეყნებული სტატისტიკის თანახმად, ჯამში გერმანიამ 320 000 უკრაინელი ლტოლვილი მიიღო.

გაზეთ Frankfurter Allgemeine Zeitung-ის დაკვეთით ჩატარებული გამოკითხვა აჩვენებს, რომ სამიდან ორი გერმანელი უკრაინელი ლტოლვილების დახმარების პროგრამაშია ჩართული, ან იცნობს პირს, ვინც ომის დევნილებს ეხმარება.