ახალი ამბები

აშშ-ის სადაზვერვო უწყებებმა გასაიდუმლოებულ შეფასებებში ამერიკელ მაღალჩინოსნებს აცნობეს, რომ ირანმა აღადგინა წვდომა თავისი სარაკეტო ბაზების უმეტესობაზე და შეინარჩუნა ომამდელი სარაკეტო არსენალისა და გამშვები დანადგარების დაახლოებით 70%.

ვითარების არსი: The New York Times-ის ცნობით, ირანმა აღადგინა ოპერატიული წვდომა ჰორმუზის სრუტის გასწვრივ მდებარე 33 სარაკეტო ობიექტიდან 30-ზე. ეს საფრთხეს უქმნის ამერიკულ სამხედრო ხომალდებსა და ნავთობტანკერებს, რომლებიც ამ ვიწრო საზღვაო გზას გადიან.

• "ამ შეფასებებთან დაკავშირებულმა პირებმა განაცხადეს, რომ დოკუმენტები მოწმობს: სხვადასხვა ობიექტზე დაზიანების დონის მიუხედავად, ირანელებს შეუძლიათ გამოიყენონ ამ ბაზების ტერიტორიაზე განთავსებული მობილური გამშვები დანადგარები. ზოგიერთ შემთხვევაში მათ რაკეტების გაშვება უშუალოდ იმ სასტარტო მოედნებიდან შეუძლიათ, რომლებიც ამ ობიექტების ნაწილია. შეფასებების თანახმად, სრუტის გასწვრივ მხოლოდ სამი სარაკეტო ბაზა რჩება სრულად მიუწვდომელი." - წერს გამოცემა.

ჩაშლილად: ასევე, ვარაუდობენ, რომ ირანი მთელი ქვეყნის მასშტაბით კვლავ ფლობს მობილური გამშვები დანადგარების დაახლოებით 70%-ს და ომამდელი სარაკეტო მარაგის დაახლოებით 70%-ს.

• ეს არსენალი მოიცავს როგორც ბალისტიკურ რაკეტებს, რომლებსაც რეგიონის სხვა ქვეყნებზე დარტყმის უნარი აქვთ, ისე ფრთოსანი რაკეტების მცირე მარაგს, რომლებიც ხმელეთზე ან ზღვაზე ახლო მანძილზე მდებარე სამიზნეების გასანადგურებლად გამოიყენება.
• დაზვერვის წარმომადგენლებმა ასევე განაცხადეს (სხვადასხვა წყაროებზე, მათ შორის თანამგზავრულ ფოტოებსა და დაკვირვების სხვა საშუალებებზე დაყრდნობით), რომ ირანმა აღადგინა წვდომა ქვეყნის მასშტაბით არსებული მიწისქვეშა სარაკეტო საცავებისა და გამშვები პუნქტების დაახლოებით 90%-ზე, რომლებიც ამჟამად ფასდება როგორც "ნაწილობრივ ან სრულად ბრძოლისუნარიანი."

სტრიქონებს შორის: ეს დასკვნები ეწინააღმდეგება პრეზიდენტ დონალდ ტრამპისა და პენტაგონის ხელმძღვანელის, პიტ ჰეგსეტის მრავალთვიან საჯარო მტკიცებებს იმის შესახებ, რომ ირანის არმია "განადგურებულია" და საფრთხეს "აღარ წარმოადგენს."

• ამ ინფორმაციის კომენტირებისას, თეთრი სახლის პრესმდივანმა ოლივია ვეილზმა გაიმეორა დონალდ ტრამპის ადრინდელი განცხადებები იმის შესახებ, რომ ირანის არმია "განადგურდა." მან აღნიშნა, რომ ნებისმიერი, ვინც "მიიჩნევს, რომ ირანმა აღადგინა თავისი შეიარაღებული ძალები, ან ილუზიებში ცხოვრობს, ან ირანის ისლამური რევოლუციის გუშაგთა კორპუსის რუპორია."

დიდი სურათი: ირანის შესაძლებლობების სადაზვერვო შეფასებები მიუთითებს ამერიკული სამხედრო სარდლობის მიერ გაკეთებული ტაქტიკური არჩევანის შედეგებზე.

• თანამდებობის პირების თქმით, როდესაც ამერიკული ჯარები ირანის გამაგრებულ სარაკეტო ობიექტებს უტევდნენ, პენტაგონმა - ბუნკერების საწინააღმდეგო ბომბების შეზღუდული მარაგის გამო - გადაწყვიტა, ეცადა შესასვლელების ბლოკირება, ნაცვლად იმისა, რომ სრულად გაენადგურებინა ობიექტები შიგნით არსებულ რაკეტებთან ერთად.

კონტექსტი: პენტაგონის ბოლო შეფასებით, ირანის წინააღმდეგ ომზე ამერიკამ უკვე 29 მილიარდი დოლარი დახარჯა.