ახალი ამბები

21 აგვისტოს, იტალიის ბანკების ვებ-გვერდებზე ჰაკერული თავდასხმები დაფიქსირდა, რის შედეგადაც ზოგიერთი სერვისი მიუწვდომელი გახდა.

ამ ინფორმაციას Reuters იტალიის კიბერუსაფრთხოების სააგენტოზე დაყრდნობით ავრცელებს.

იტალიური სააგენტოს წარმომადგენლის თქმით, ჰაკერებმა DDoS შეტევები განახორციელეს ბანკების - Intesa Sanpaolo, Monte dei Paschi di Siena, BPER Banca, FinecoBank და Banca Popolare di Sondrio ვებ-გვერდებზე.

Reuters-ის ცნობით, კიბერთავდასხმების უკან პრორუსი ჰაკერები იდგნენ ჯგუფიდან Noname057(16).

ერთ-ერთი ბანკიდან წყარომ Reuters-ს განუცხადა, რომ მათი საიტი მძიმე ტრაფიკის გამო გაითიშა, მაგრამ მხოლოდ მცირე ხნით, ხოლო მობილური აპლიკაცია მუშაობას განაგრძობდა.

უკრაინის დახმარების გამო, ივლისში რუსი ჰაკერები Noname057-ის დაჯგუფებიდან ბულგარეთის პარლამენტის ვებ-გვერდს დაესხნენ თავს.