ახალი ამბები

საფრანგეთის საგარეო საქმეთა სამინისტრომ გაეროს რასობრივი დისკრიმინაციის აღმოფხვრის კომიტეტის (CERD) განცხადებებს უსაფუძვლო და ცალმხრივი უწოდა.

კომიტეტმა განაცხადა, რომ მსგავს დისკრიმინაციას პოლიცია ახორციელებს.

"ფრანგი სამართალდამცავების მხრიდან რასიზმის ან სისტემური დისკრიმინაციის შესახებ ნებისმიერი ბრალდება უსაფუძვლოა," - ნათქვამია საფრანგეთის საგარეო საქმეთა სამინისტროს განცხადებაში, რომელიც 8 ივლისს გამოქვეყნდა.

სამინისტრო აღნიშნავს, რომ რასიზმისა და დისკრიმინაციის ყველა ფორმის წინააღმდეგ ბრძოლა პოლიტიკური პრიორიტეტია.

ოფიციალურ განცხადებაში ნათქვამია, რომ საფრანგეთი ასრულებს რასობრივი დისკრიმინაციის აღმოფხვრის საერთაშორისო კონვენციის დებულებებს და მკაცრად აკონტროლებს პოლიციას. ქვეყანაში მოქმედებს რასობრივი პროფილის დანაშაულის აკრძალვა, ხოლო სამართალდამცავების მიერ ძალის გამოყენება "რეგულირდება აბსოლუტური აუცილებლობისა და პროპორციულობის პრინციპებით."

"საფრანგეთი CERD-ს მოუწოდებს, გამოიჩინოს დიდი სიფრთხილე და თავშეკავება თავის განცხადებებში, რომლებიც, სამწუხაროდ, ცალმხრივია." - ნათქვამია განცხადებაში.

საფრანგეთში მასშტაბური საპროტესტო აქციები 17 წლის მძღოლის მკვლელობამ გამოიწვია, რომელიც პოლიციამ გზაზე პატრულირების დროს ცეცხლსასროლი იარაღით მოკლა.