ახალი ამბები

გაერთიანებული სამეფოს პრემიერ-მინისტრის თქმით, ქვეყანა მზად არის განათავსოს თავისი ჯარები უკრაინაში ცეცხლის შეწყვეტის შემდეგ. 

ამის შესახებ კირ სტარმერმა დონალდ ტრამპთან შეხვედრის შემდეგ ერთობლივ პრესკონფერენციაზე განაცხადა. 

"მე ახლოს ვთანამშრომლობ ევროპელ ლიდერებთან და მინდა მკაფიოდ ვთქვა - ბრიტანეთი მზად არის გაგზავნოს სახმელეთო ჯარები და აფრინოს ავიაცია, რათა მხარი დაუჭიროს შეთანხმებას. ახლოს ვმუშაობთ მოკავშირეებთ, რადგან ეს არის ერთადერთი საშუალება ვუზრუნველყოთ მშვიდობა"- განაცხადა ბრიტანეთის პრემიერმა.

მისი თქმით, უკვე 18 სახელმწიფოა ჩართულ შესაბამის მოლაპარაკებებში და ლონდონი მათ წარმომადგენლებს 2 მარტს უმასპინძლებს. 

სტარმერმა ხაზი გაუსვა, რომ დაუშვებელია ისეთი მშვიდობა, რომელიც დააჯილდოვებს აგრესორს. ბრიტანელი პრემიერის განცხადებამ მისი ქვეყანა მზად არის გაზარდოს უკრაინის სამხედრო დახმარება "ისე როგორც არასდროს."

კონტექსტი 

20 თებერვალს Financial Times საკუთარ წყაროებზე დაყრდნობით წერდა, რომ დიდი ბრიტანეთი და საფრანგეთი უკრაინაში ცეცხლის შეწყვეტის შემდეგ სადაზღვევო" (Reassurance) სამხედრო კონტინგენტის განთავსებას განიხილავენ. 

ამგვარი კონტინგენტის კონცეფცია მოიაზრებს შედარებით მცირერიცხოვან სახმელეთო დანაყოფებს და აქცენტი ძირითადად ავიაციაზე გაკეთდება - რაშიც ევროპას რუსეთთან შედარებით საგრძნობი უპირატესობა აქვს. 

"ავიაცია არის სფერო, რომელშიც ჩვენ გვაქვს გარკვეული უპირატესობა, ჰაერიდან ჩვენ გვექნება შესაძლებლობა ვუპასუხოთ რუსეთის მიერ ცეცხლის შეწყვეტის შეთანხმების დარღვევას, ეს სადამსჯელო მიდგომაა, რომ გვქონდეს რუსეთის დასჯის საშუალება შეთანხმების დარღვევის შემთხვევაში"- ამბობს გამოცემასთან საუბარში ერთ-ერთი ანონიმური წყარო. 

საფრანგეთისა და დიდი ბრიტანეთის არმიების მოკრძალებული ზომიდან გამომდინარე საუბარია შედარებით მცირერიცხოვან სახმელეთო დანაყოფებზე. სავარაუდოა, რომ ინიციატივის დამტკიცების შემთხვევაში მისიას ფრანკო-ბრიტანული გაერთიანებული საექსპედიციო ძალები უხელმძღვანელებენ - ეს უკვე არსებული სტრუქტურაა, რომლის ერთი შტაბ-ბინა ლონდონში, ხოლო მეორე პარიზის შემოგარენში მდებარეობს. სხვა ქვეყნების სამხედრო დანაყოფები სწორედ ამ ფორმატს შეერწყმებიან. 

მსგავსი იდეის განხილვის შესახებ ცოტა ხნით ადრე საკუთარ სოციალურ ქსელში დაწერა ბრიტანული Time-ის თავდაცვის სექციის რედაქტორმა, ლარისა ბრაუნმა.

ბრაუნის ცნობით, საუბარია დაახლოებით 30-ათასიან სამხედრო კონტინგენტზე ევროპული სარდლობის ქვეშ, რომლებიც უკრაინის საკვანძო ქალაქებში, პორტებსა და ეროვნული ინფრასტრუქტურის კრიტიკულ კვანძებთან ახლოს განთავსდებიან. 

ბრაუნის თქმით, სავარაუდოა, რომ ამგვარი დანაყოფები ფრონტის ხაზიდან მოშორებით განთავსდებიან, ხოლო ფრონტის ხაზის მონიტორინგი ტექნიკური საშუალებებით განხორციელდება, მათ შორის სამხედრო თვითმფრინავებით, დრონებითა და სატელიტური დაკვირვების მეშვეობით. 

Time-ის რედაქტორის ცნობით, ასეთ პირობებში უკრაინის საჰაერო სივრცე დაცული იქნება, ხოლო კომერციული ავია შეტყობინება აღდგება, რადგან გაერთიანებულ ძალებს შეეძლებათ რუსული რაკეტებისა და თავდასხმის სხვა საშუალებების განეიტრალება. 

სამხედრო ექსპერტი აღნიშნავენ, რომ უკრაინაში ამგვარი შეზღუდული ევროპული კონტინგენტის ეფექტური ფუნქციონირება შეუძლებელი იქნება აშშ-ს სადაზვერვო და ლოჯისტიკური მხარდაჭერის გარეშე.

ამ დროისთვის ტრამპის ადმინისტრაციაში გამორიცხავენ უკრაინაში სამხედრო დანაყოფების რამენაირი ფორმით გაგზავნას, თუმცა ტრამპმა აღნიშნა, რომ არ ეწინააღმდეგება ცეცხლის შეწყვეტის შემდეგ უკრაინაში ევროპული ჯარების განთავსებას. 

უკრაინაში ევროპული ჯარების განთავსებას, თუნდაც ნატოს ფორმატის გარეშე მიუღებელი უწოდა სერგეი ლავროვმა ერ-რიადში გამართული მოლაპარაკებების შემდეგ.