უნგრეთმა კვლავ დაბლოკა ევროკავშირის ფონდი, საიდანაც უკრაინისთვის იარაღი ფინანსდება
![](https://realpolitika.ge/storage/images/cache/900x440/2024-02-17T144823Z_1759642412_RC2E46A6S5T7_RTRMADP_3_HUNGARY-ORBAN-1024x682.jpg)
ევროკავშირის ქვეყნების საგარეო საქმეთა მინისტრებმა ორშაბათს, ბრიუსელში გამართულ შეხვედრაზე კიდევ ერთხელ ვერ მიაღწიეს შეთანხმებას ევროპის მშვიდობის ფონდიდან თანხების განბლოკვის შესახებ, საიდანაც უკრაინისთვის იარაღის მიწოდება ფინანსდება.
ამის შესახებ ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში, ჟოზეპ ბორელმა პრესკონფერენციაზე განაცხადა.
ბორელის თქმით, ევროკავშირის საგარეო საქმეთა საბჭოს შეხვედრაზე მინისტრებმა განიხილეს უკრაინის მხარდაჭერის გაძლიერების აუცილებლობა, განსაკუთრებით საავადმყოფოებზე რუსეთის ბოლო თავდასხმების გათვალისწინებით.
სხვა საკითხებთან ერთად, საუბარი იყო ევროპის მშვიდობის ფონდიდან თანხების განბლოკვაზე, რომელიც აფინანსებს ევროკავშირის ქვეყნების ხარჯებს უკრაინას სამხედრო დახმარებაზე.
"წევრი ქვეყნების უმრავლესობა დაჟინებით მოითხოვდა გადასახდელებზე ბლოკირების მოხსნას, რომლებიც თვეებისა და ერთი წლის განმავლობაში იყო დაგვიანებული და ამავე დროს, აღნიშნეს, რომ საჭიროა წინსვლა უკრაინის მხარდაჭერის ახალ ფონდთან დაკავშირებით, რომელსაც წელიწადზე მეტია ბლოკავს ერთი წევრი სახელმწიფო," - განაცხადა ბორელმა. "ეს წევრი ქვეყანა ამტკიცებდა, რომ ეს არის რაღაც მიუღებელი, აუტანელი და, სამწუხაროდ, ჩიხური მდგომარეობა გრძელდება."
მიუხედავად იმისა, რომ ევროკავშირის უმაღლესმა წარმომადგენელმა არ თქვა, რომელ ქვეყანაზე იყო საუბარი, ცნობილია, რომ სწორედ უნგრეთი ბლოკავს ევროპის მშვიდობის ფონდიდან 6 მილიარდ ევროზე მეტის გამოყოფას უკრაინის სამხედრო დახმარების დასაფინანსებლად.
ეს იმის მიუხედავად, რომ ბუდაპეშტს აქვს გარანტიები, რომ უნგრეთის შენატანები ევროპის მშვიდობის ფონდში არ დაიხარჯება უკრაინის სამხედრო დახმარებაზე.