ბლოკადის მიუხედავად აშშ-მა კუბაში რუსული ტანკერის შესვლას ხელი არ შეუშალა
აშშ-მა რუსულ ტანკერს "ანატოლი კოლოდკინს" კუბის სანაპიროსთან მისვლის საშუალება მისცა.
ჩაშლილად: კუნძულის ბლოკადის მიუხედავად 730 000 ბარელი ნავთობით დატვირთული გემი კუბაში ჩავიდა.
- The New York Times წყაროზე დაყრდნობით წერს, რომ სანაპირო დაცვის ორმა ამერიკულმა გემმა ტანკერი არ გააჩერა.
- მოგვიანებით დონალდ ტრამპმა განაცხადა, რომ კუბაზე ნავთობის გაგზავნის "წინააღმდეგი არ არის".
- "მე მათ ვუთხარი: თუ რომელიმე ქვეყანას სურს კუბაზე ნავთობი გაგზავნოს, ამასთან პრობლემა არ მაქვს. სულ ერთია რუსეთი იქნება თუ რომელიმე სხვა ქვეყანა. ამას არანაირი გავლენა არ ექნება, კუბის ამბავი დასრულებულია". - თქვა აშშ-ს პრეზიდენტმა.
კონტექსტი: აშშ-ს მიერ კუბის ბლოკადა მიმდინარე იანვრიდან გრძელდება.
- ვენესუელის პრეზიდენტის, ნიკოლას მადუროს დაკავებიდან მცირე დროში, ტრამპმა განაცხადა, რომ კუბა ნავთობს ვეღარ მიიღებს.
- განცხადებიდან რამდენიმე კვირაში ტრამპმა კუბაში ნავთობის შემტან ქვეყნებს ტარიფები დაუწესა.
- ექსპერტების ნაწილს მიაჩნია, რომ ვაშინგტონის მხრიდან დათმობა ირანში მიმდინარე ომს უკავშირდება და აშშ-ს კუბის გამო რუსეთთან ურთიერთობის გართულება არ სურს.
წინარე ისტორია: 18 თებერვალს ვლადიმირ პუტინმა კრემლში კუბის საგარეო საქმეთა მინისტრი ბრუნო როდრიგეს პარილიო მიიღო.
- შეხვედრას ასევე ესწრებოდა "როსნეფტის" ხელმძღვანელი იგორ სეჩინი.
- 19 მარტს აშშ-ს ფინანსთა სამინისტრომ კუბა იმ ქვეყნების სიაში შეიყვანა, რომელთაც რუსეთიდან ნავთობის ყიდვა ეკრძალებათ.
- საპასუხოდ 25 მარტს, რუსეთის ენერგეტიკის მინისტრმა, სერგეი ცივილევმა განაცხადა, რომ რუსეთი არ ყიდის ნავთობს, ხოლო გაგზავნილი ტანკერი ჰუმანიტარული დახმარებაა.
