ახალი ამბები

უკრაინის შეიარაღებული ძალების ყოფილმა მთავარსარდალმა, ახლა კი ბრიტანეთში უკრაინის ელჩმა, ვალერი ზალუჟნიმ განაცხადა, რომ 2023 წელს უკრაინის კონტრშეტევა ძალების ნაკლებობის გამო იყო წარუმატებელი, ხოლო კურსკის ოპერაციამ უკრაინის არმიას ოპერატიული წარმატება არ მოუტანა.

ვითარების არსი: Дзеркалі тижня-ში გამოქვეყნებული სტატია ინოვაციების როლზეა საბრძოლო მოქმედებების სტრატეგიულ დაგეგმვაში. ამავდროულად, მან წარსულიც შეაფასა, კერძოდ, უკრაინის კონტრშეტევა 2023 წელს, როდესაც ის ჯერ კიდევ მთავარსარდლის თანამდებობაზე იყო.

• მისი თქმით, ამ კონტრშეტევის ჩავარდნა "შემტევი მოქმედებების განმახორციელებელი დაჯგუფებების ძალებისა და საშუალებების არასაკმარისმა რაოდენობამ" განაპირობა.
• "მტრის ასეთი ფრონტის გასარღვევად, საჭირო იყო გადამწყვეტი უპირატესობა ძალებსა და საშუალებებში ზუსტად გარღვევის სექტორში, ასევე მობილური რეზერვები, რომლებსაც შეეძლოთ სწრაფად შესულიყვნენ ჩამოყალიბებულ გარღვევაში და გასულიყვნენ ოპერატიულ სივრცეში, მანამ სანამ მოვიდოდა მტრის რეზერვები კონტრშეტევისთვის ან ორგანიზდებოდა თავდაცვის ახალი ხაზი. სამწუხაროდ, ობიექტური და სუბიექტური მიზეზების გამო, ჩვენ ასეთი უპირატესობის შექმნა უშუალოდ შეტევის წინ უკვე აღარ შეგვეძლო." - აღნიშნა ზალუჟნიმ.
• "ზაფხულის შეტევის (2023 წელს - რედ.) შედეგების ღრმა გადააზრება გამოწვეული იყო არა მხოლოდ რეაქციით ომის ასეთი რთული ელემენტის რეალითი შოუდ გადაქცევის მცდელობაზე, სადაც ჯერ ჩვენი გეგმები უცნაურად მოხვდა რუსეთში, შემდეგ კი მის მსვლელობას ონლაინ რეჟიმში აკომენტარებდნენ სხვადასხვა სახის წინასწარმეტყველები, რომლებიც მოგვიანებით სანქციების ან ძებნის ქვეშ აღმოჩნდნენ. ამ გეგმების ჩავარდნას დღემდე მტკივნეულად განვიცდი. თუმცა, მთავარი ის იყო, რომ უკიდურესად აუცილებელი იყო, დასკვნები გამოგვეტანა და დაუყოვნებლივ შეგვეცვალა სტრატეგია. სტრატეგია, რომელიც სრულიად ახალ ომში გადარჩენის შესაძლებლობას მოგვცემდა." - თქვა ყოვეილმა მთავარსარდალმა.

ჩაშლილად: ზალუჟნი წერს, რომ 2022 წლიდან ფრონტზე საბრძოლო მოქმედებებმა პოზიციური ხასიათის მიღება დაიწყო.

• "დღეს, იმ დღეების გაანალიზებით და საკუთარი მასალების შესწავლით, მე ისევ და ისევ ვადასტურებ, რომ ფაქტობრივად, როგორც რუსეთის, ისე უკრაინის შეიარაღებული ძალები მართლაც შევიდნენ პოზიციურ ჩიხში, მსგავსად იმისა, რაც პირველ მსოფლიო ომში მოხდა. ფაქტობრივად, ჯერ კიდევ 2022 წლის შემოდგომიდან, სწორედ დონეცკის მიმართულებაზე საბრძოლო მოქმედებებმა უკვე თანდათან შეიძინა პოზიციური ხასიათი." - თქვა მან.
• ამასთან, ზალუჟნიმ ხაზი გაუსვა, რომ რუსები წინსვლას "გამოფიტვის" ტაქტიკის წყალობით ახერხებენ, რომლის დროსაც ალყაში მოქცევის მსგავსი მანევრები ნაკლებად სავარაუდოა.

სტრიქონებს შორის: ზალუჟნი კურსკის ოლქში უკრანის ოპერაციაზე საუბრობს, როგორც მტერზე მოულოდნელი დარტყმის მიყენების წარუმატებელი მცდელობაზე.

• "რა თქმა უნდა, ასეთი მოქმედებები (კურსკის ოპერაცია - რედ.), თუ ისინი გამართლებულია, უპირველეს ყოვლისა, ადამიანური დანაკარგებით, შეზღუდული მიზნებით, შეიძლება განხორციელდეს. თუმცა, პრაქტიკამ აჩვენა, რომ საბოლოო ჯამში, იზოლირებული ტაქტიკური გარღვევა ფრონტის ვიწრო სექტორზე აუცილებელ წარმატებას არ მოუტანს შემტევ მხარეს. თავდაცვაში მყოფმა ჯარებმა მოახერხეს, გამოეყენებინათ როგორც ტექნოლოგიური, ასევე ტაქტიკური უპირატესობები და დროთა განმავლობაში, არა მხოლოდ არ დაუშვეს ტაქტიკური გარღვევის ოპერატიულ წარმატებაში გადაზრდა, არამედ მოგვიანებით თავად ჰქონდა ტაქტიკური წინსვლა - ასევე ოპერატიული წარმატების გარეშე." - წერს ბრიტანეთში უკრაინის ელჩი.
• "ასეთი ქმედებების ფასი ჩემთვის უცნობია, თუმცა აშკარაა, რომ ის ძალიან მაღალი იყო. ზემოთქმულის შეჯამებით, გავიმეორებ, რომ პოზიციური ჩიხის საფუძველში დევს არა მხოლოდ თავდაცვითი ხაზების გარღვევის შეუძლებლობა, არამედ, რაც ყველაზე მთავარია, ოპერატიული ამოცანების შესრულების შეუძლებლობა, მათ შორის ოპერატიულ სივრცეში გასვლა." - აღნიშნა უკრაინის არმიის ყოფილმა მთავარსარდალმა.

კონტექსტი: 2024 წელს უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინის კონტრშეტევის გეგმები 2023 წლის შემოდგომაზე "კრემლის მაგიდაზე იყო, სანამ კონტრშეტევა დაიწყებოდა."