ახალი ამბები

ფინეთის პრეზიდენტმა ალექსანდრ სტუბმა კიევში ვიზიტისას განაცხადა, რომ ფინეთი უკრაინას საჰაერო თავდაცვისა და ენერგეტიკის სფეროში ახალ დახმარებას გაუწევს, რადგან ქვეყანა რუსული თავდასხმების პირობებში კიდევ ერთი ზამთრისთვის ემზადება.

ვითარების არსი: ჩრდილოეთისა და ბალტიისპირეთის ქვეყნების "უკრაინა-NB8"-ის სამიტის შემდეგ გამოსვლისას, სტუბმა აღნიშნა, რომ ფინეთის დახმარების მორიგი პაკეტი უკრაინის საჰაერო თავდაცვის ყველაზე გადაუდებელ საჭიროებებს დააკმაყოფილებს.

• ფინეთი ასევე ამზადებს ენერგეტიკულ დახმარებას, მათ შორის აღჭურვილობას, რომელიც უკრაინის ელექტროსისტემას დაეხმარება.
• "ზამთარი ახლოვდება და, როგორც იცით, ფინეთში ჩვენც გარკვეული წარმოდგენა გვაქვს ზამთარზე. ასე რომ, ენერგეტიკის კუთხით კარგი სიახლეები იქნება, განსაკუთრებით მაშინ, როდესაც საქმე ელექტროენერგიას ეხება - მათ შორის ძრავებსა და ტურბინებს, რომლებიც შესაძლოა გამოსადეგი იყოს." - ხაზი გაუსვა ფინეთის პრეზიდენტმა.

სტრიქონებს შორის: სტუბთან ერთად კიევში ფინური თავდაცვითი კომპანიების შვიდი წარმომადგენელიც ჩავიდა.

• უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინულმა კომპანიებმა ხელი მოაწერეს შეთანხმებებს ფინეთში დრონების წარმოებაზე. თანამშრომლობა მოიცავს უპილოტო საზღვაო სისტემების გაფართოებასა და უპილოტო სახმელეთო აპარატების საწარმოო ობიექტის დაარსებას.
• სტუბმა ასევე აღნიშნა, რომ ფინეთში უკრაინისადმი საზოგადოებრივი მხარდაჭერა სტაბილურად 80%-ზე მაღალია.
• "ჩვენ ყოველთვის ვთვლიდით, რომ როდესაც დიდი აგრესორი თავს ესხმის შედარებით მცირე მოთამაშეს, ყველაზე მნიშვნელოვანი ამ მცირე მოთამაშის გადარჩენაა," - განაცხადა მან და ხაზი გაუსვა, რომ მიუხედავად იმისა, რომ უკრაინა ახლა ბევრად უფრო ძლიერ პოლიტიკურ, სამხედრო და ფინანსურ პოზიციაშია, მხარდაჭერის გაგრძელება კვლავ აუცილებელია.

დიდი სურათი: 23 აგვისტოს, ნორვეგიის მთავრობამ განაცხადა, რომ 2027 წელს უკრაინას 85 მილიარდი ნორვეგიული კრონის ($9.2 მილიარდი - რედ.) ფინანსურ მხარდაჭერას გამოუყოფს.

• ნორვეგიის პრემიერ-მინისტრმა იონას გარ სტიორემ კიევში, უკრაინის პრეზიდენტ ვოლოდიმირ ზელენსკისთან შეხვედრისას აღნიშნა, რომ მთავრობა დაფინანსების მოთხოვნას დამტკიცების მიზნით ნორვეგიის პარლამენტს ოფიციალურად წარუდგენს.
• ნორვეგიის მთავრობის განცხადების თანახმად, 2027 წლის დახმარების პაკეტი ძირითადად სამხედრო მხარდაჭერაზე დაიხარჯება, რაც მოიცავს შეიარაღების პირდაპირ შესყიდვას უკრაინის თავდაცვითი ინდუსტრიისგან.