ახალი ამბები

გაერთიანებული სამეფოს თავდაცვის მინისტრი ჯონ ჰილი სამხედრო ხარჯებთან დაკავშირებული უთანხმოების გამო თანამდებობიდან გადადგა.

როგორც სააგენტო Reuters-ი იტყობინება, ჰილიმ პრემიერ-მინისტრი კირ სტარმერი დაადანაშაულა იმაში, რომ მზარდი საფრთხეების ფონზე, მთავრობა ქვეყნის დასაცავად საჭირო რესურსებს არ გამოყოფს.

რატომ არის მნიშვნელოვანი: ეს მოულოდნელი გადადგომა ააშკარავებს ბრიტანეთის მთავრობის შიგნით არსებულ დიდ კრიზისს: როგორ გაზარდოს ქვეყანამ თავდაცვის ხარჯები მაშინ, როდესაც ბიუჯეტში თავისუფალი თანხმები არ მოიპოვება.

• ამასთანავე, ეს ფაქტი კიდევ უფრო აძლიერებს პოლიტიკურ ზეწოლას პრემიერ სტარმერზე, რომელიც ისედაც შიდაპარტიული ლიდერობისთვის ბრძოლის მოლოდინშია.

მოვლენების განვითარება: სააგენტოს მიხედვით, სამეფოს თავდაცვისა და ფინანსთა სამინისტროები თვეების განმავლობაში ვერ თანხმდებიან სამხედრო ბიუჯეტის მოცულობაზე. ამის გამო მუდმივად იწევდა „თავდაცვის საინვესტიციო გეგმის“ გამოქვეყნების თარიღი, რომელიც ჯერ კიდევ გასულ წელს უნდა ყოფილიყო მზად.

• სამხედროები აღნიშნავენ, რომ თავდაცვის ახალი გეგმა აუცილებელია გაერთიანებული სამეფოს წყლებში რუსული სამხედრო გემების ხშირი შემოჭრის ფონზე.

• თუმცა, ქვეყანაში საგადასახადო ტვირთი ბოლო ათწლეულების მანძილზე უმაღლეს ნიშნულზეა, რაც მთავრობას ვალების შემცირებას აიძულებს.

რას ამბობენ: პრემიერმა სტარმერმა განაცხადა, რომ თავდაცვის გეგმა ნატოს 7 ივლისის სამიტამდე გამოქვეყნდებოდა, თუმცა გადამდგარი მინისტრი თავის წერილში სკეპტიციზმს ინარჩუნებს.

• „თქვენი ფინანსური გეგმა ბევრად ჩამოუვარდება იმას, რაც ქვეყნის უსაფრთხოებას სჭირდება. იძულებული ვარ მივიღო ისეთი გადაწყვეტილებები, რომლებიც შეამცირებს ჯარების საბრძოლო მზადყოფნას და ქვეყანას ნაკლებად უსაფრთხო გახდის“ - დაწერა ჰილმა.

დიდი სურათი: სამეფო გეოპოლიტიკური გამოწვევის წინაშე დგას. მაშინ, როდესაც აშშ ევროპის უსაფრთხოებაზე ზრუნვას თანდათან ამცირებს, ახლო აღმოსავლეთში მიმდინარე ომმა გაერთიანებული სამეფოს ფლოტის მოუმზადებლობა აჩვენა - მათ ვერ შეძლეს რეგიონში თანამედროვე ხომალდის დაუყოვნებლივ გაგზავნა.