ახალი ამბები

გერმანიაში ბოლო 24 საათში მესამე დივერსია მოხდა, პარალელურად კი სამართალდამცავებმა ლაიფციგის აეროპორტზე დრონებით განხორციელებული იერიშის უშუალო შემსრულებლების იდენტიფიცირება შეძლეს.

ვითარების არსი: კიოლნთან მდებარე ქალაქ ბერგჰაიმის ელექტროქვესადგურზე, მოკლე ჩართვის შემდეგ, პოლიციამ ექვსი ასაფეთქებელი მოწყობილობა აღმოაჩინა.

• კიოლნის კრიმინალური პოლიციის ხელმძღვანელის, მიხაელ ესერის განცხადებით, საქმე ეხება პიროტექნიკას, რომლის მეშვეობითაც ელექტროგადამცემ ხაზზე მავთული გადააგდეს და ჩართვა გამოიწვიეს, რის გამოც რამდენიმე ენერგობლოკის გაჩერება გახდა საჭირო.
• მომხდარს გერმანია დივერსიის მუხლით იძიებს.

დეტალურად: ინფრასტრუქტურაზე თავდასხმები ერთდროულად რამდენიმე რეგიონში დაფიქსირდა.

• გამომძიებლები იკვლევენ კავშირს ბრანდენბურგის ინციდენტთან - ტურნოვ-პრაილაკის ქვესადგურის ელექტროგადამცემ ხაზთან ასაფეთქებელი ნივთიერებები წინა დღეს ანალოგიური მეთოდითა და ფეიერვერკების გამოყენებით აღმოაჩინეს.

• ბავარიის ქალაქ აუგსბურგის რკინიგზის სადგურზე უცნობი მოწყობილობა აფეთქდა, რის შედეგადაც ორი ადამიანი მსუბუქად დაშავდა; რამდენიმე საათში ადგილზე მეორე მოწყობილობაც იპოვეს.

ჩაშლილად: გერმანიის ფედერალურმა კრიმინალურმა უწყებამ ლაიფციგ-ჰალეს აეროპორტზე დრონებით თავდასხმის მცდელობაში ეჭვმიტანილი ორი პირი გამოავლინა, გენპროკურატურამ კი მათ ბრალი უკვე წარუდგინა.

• რუსეთისა და ბელარუსის ორმაგი მოქალაქე, რომლის დნმ-ის კვალიც ერთ-ერთ დრონზე, ასაფეთქებლიან კონსერვის ქილასა და რადიომართვის ანტენაზე აღმოჩნდა. მან აპრილის ბოლოს მინსკში იტალიის ტურისტული შენგენის ვიზა მიიღო და ევროკავშირში ისე შევიდა.

• კოორდინატორი - რუსეთში დაბადებული ლატვიის მოქალაქე, რომელსაც კავშირები აქვს რუსეთის სპეცსამსახურებთან. ის ბერლინში ივლისის ბოლოს ჩაფრინდა, ნაქირავები მანქანით ლაიფციგში გაემგზავრა, თავდასხმიდან ორ დღეში კი გერმანია ისევ ბერლინის აეროპორტიდან დატოვა.

• სამართალდამცავების შეფასებით, თავდამსხმელები სულ მცირე სამი დრონის გამოყენებას გეგმავდნენ; მათი სამიზნე აეროდრომზე მდგარი უკრაინული სატრანსპორტო თვითმფრინავი "Ан-124" იყო, რომელიც გაუმართაობის გამო აფეთქებას გადაურჩა, ხოლო მეორე დრონი DHL-ის სატვირთო თვითმფრინავს შეეჯახა.

რატომ არის მნიშვნელოვანი: გერმანიის მთავრობამ რუსეთი ქვეყნის ტერიტორიაზე აგრესიულ ქმედებებში ოფიციალურად პირველად დაადანაშაულა. როგორც შინაგან საქმეთა მინისტრმა აღნიშნა, ლაიფციგის ინციდენტი უკრაინის ევროპელი მოკავშირეების წინააღმდეგ რუსეთის მიერ წარმოებული ჰიბრიდული ომის ნაწილია.

• საპასუხოდ, ბერლინი ბონში რუსეთის გენერალურ საკონსულოსა და ბერლინში "რუსულ სახლს" ხურავს, აძლიერებს კონტროლს რუსეთის მოქალაქეების შემოსვლაზე და ზრდის სანქციურ წნეხს რუსულ "ჩრდილოვან ფლოტზე".

კრემლის პასუხი: ვლადიმირ პუტინმა ბერლინის ბრალდებები უარყო და განაცხადა, რომ გერმანიის ხელისუფლების ნაბიჯები შიდაპოლიტიკურ პროცესებსა და ეკონომიკურ პრობლემებს უკავშირდება.

• "საწარმოები იხურება, სამუშაო ადგილები... გაუგებარია, რისთვის კეთდება ეს ყველაფერი. ამის ახსნა მხოლოდ ერთით შეიძლება - აგრესიულ რუსეთთან დაპირისპირებით. მტკიცებულებები კი სად არის?" - განაცხადა პუტინმა.