ახალი ამბები

ვლადიმირ პუტინი თავდაპირველად მზად იყო შეხვედროდა CIA-ის დირექტორს, ჯონ რეტკლიფს, 25 აგვისტოს მოსკოვში მისი ვიზიტის დროს და შესაძლო მოლაპარაკებებისთვის საკუთარი გრაფიკიც კი გაათავისუფლა.

 ინფორმაციას სააგენტო "აგენტსტვოს" კრემლთან დაახლოებულმა წყარომ განუცხადა.

რატომ არის მნიშვნელოვანი: სააგენტოს თანახმად, მას შემდეგ, რაც ამერიკელის მიერ ჩატანილი გზავნილის შინაარსი პუტინისთვის ცნობილი გახდა, შეხვედრა მიზანშეუწონლად მიიჩნიეს 

დეტალები: "აგენტსტვოს" თანამოსაუბრის თქმით, რეტკლიფი მოსკოვში ჩავიდა რუსეთის ხელმძღვანელობისადმი მოწოდებით, რაც შეიძლება სწრაფად შეთანხმდნენ ომის დასრულებაზე.

• CIA-ის დირექტორმა შეხვედრისას რუსულ მხარეს განუცხადა, რომ ქვეყნის სამხედრო და ეკონომიკური მდგომარეობა უარესდება და მოსკოვისთვის უფრო მომგებიანია შეთანხმების ახლა დადება, ვიდრე შემდგომ დასუსტებას დაელოდოს.

• ვიზიტის დროს რეტკლიფი შეხვდა SVR-ის (საგარეო დაზვერვის სამსახური) ხელმძღვანელს სერგეი ნარიშკინს და, როგორც რამდენიმე დასავლურმა გამოცემამ გაავრცელა ინფორმაცია, FSB-ის ხელმძღვანელს ალექსანდრ ბორტნიკოვს.

• "აგენტსტვოს" წყაროს ცნობით, ერთ-ერთი ამ შეხვედრის შემდეგ საუბრის შინაარსი პუტინს გადასცეს, რის შემდეგაც კრემლმა პრეზიდენტის CIA-ის დირექტორთან პირად შეხვედრაზე უარი თქვა.

• "მისი გზავნილი ისე გამოიყურებოდა, თითქოს ზელენსკი უკვე პოკლონაია-გორაზე დგას და ჭოგრიტით ათვალიერებს კრემლს. ყველასთვის გასაგებია, რომ ეს ასე არ არის", - უთხრა "აგენტსტვოს" რესპონდენტმა.

• "როგორც ჩანს, რეტკლიფს მისამართი შეეშალა", - ასე აღწერა "აგენტსტვოს" წყარომ კრემლის რეაქცია ამ გზავნილზე. ასახავდა თუ არა CIA-ის დირექტორის პოზიცია დონალდ ტრამპის მთელი ადმინისტრაციის პოზიციას, წყარომ არ იცის.

კონტექსტი: CIA-ის ხელმძღვანელის რანგში რეტკლიფის პირველი ცნობილი ვიზიტი მოსკოვში 25 აგვისტოს დილით შედგა. დასავლურმა გამოცემებმა, წყაროებზე დაყრდნობით, მისი ვიზიტის მიზნების რამდენიმე ვერსია წამოაყენეს.

• NYT-ის ვერსიით, რეტკლიფი ჩავიდა, რათა მოსკოვისთვის მოეწოდებინა შეთანხმების დადებისკენ, სანამ მისი სამხედრო და ეკონომიკური მდგომარეობა კიდევ უფრო არ გაუარესებულა.

• Axios-მა დაწერა, რომ რეტკლიფმა ასევე შესთავაზა ტრამპი–პუტინი–ზელენსკის სამმხრივი სამიტის იდეა. გამოცემის ცნობით, ვიზიტის შემდეგ რეტკლიფი მივიდა დასკვნამდე, რომ სწორედ ბორტნიკოვია "კონსტრუქციული მოთამაშე", რომელსაც პოტენციურად შეუძლია დიპლომატიური მოლაპარაკებების გადატვირთვაში დახმარება.

• The Wall Street Journal და Politico იტყობინებოდნენ მისიის კიდევ ერთი კომპონენტის შესახებ - მოსკოვის გაფრთხილება ნატო-ს ქვეყნებზე, უპირველესად ბალტიისპირეთის სახელმწიფოებზე შესაძლო თავდასხმის დაუშვებლობის თაობაზე. თუმცა თავად ტრამპმა უარყო, რომ რეტკლიფი მოსკოვში ნატო-ზე თავდასხმის შესახებ გასაფრთხილებლად ან ირანის განსახილველად ჩავიდა და ამ ვიზიტს "გარკვეულწილად რუტინული" უწოდა. ამასთან, აშშ-ის პრეზიდენტმა დაუშვა, რომ ამ ვიზიტიდან "შეიძლება რაღაც გამოვიდეს" და დაამატა, რომ მისი ადმინისტრაცია უკრაინაში ომის დასრულებას ცდილობს.

• The Washington Post-ის მონაცემებით, ვაშინგტონში შიშობდნენ, რომ კრემლი აშშ-ის გაჭიანურებულ ომს ირანთან და ამერიკული იარაღის მარაგების ამოწურვას ევროპაში ესკალაციის შესაძლებლობად აღიქვამს. გაზეთის ცნობით, რეტკლიფი აფრთხილებდა რუსულ მხარეს, რომ უკრაინაში ომის სერიოზული ესკალაცია საპირისპირო შედეგს გამოიღებდა და ტრამპს ზელენსკისთან უფრო დააახლოებდა.