ახალი ამბები

პოლონეთის პრემიერ-მინისტრმა დონალდ ტუსკმა, მისი მთავრობის მიერ უკრაინისთვის Patriot-ის სისტემის რაკეტების სავარაუდო საიდუმლო გადაცემასთან დაკავშირებული სკანდალის ფონზე, ყველას შეახსენა, რომ კიევის სამხედრო დახმარება ვარშავის კონსენსუსური პოლიტიკაა.

ვითარების არსი: ტუსკმა კომენტარი გააკეთა უკრაინისთვის Patriot-ის საჰაერო თავდაცვის სისტემების რაკეტების მიწოდებაზე, რაც მისმა მთავრობამ, სავარაუდოდ, სეიმისგან ფარულად გააკეთა. მიუხედავად იმისა, რომ ტუსკს ეს ინფორმაცია არც დაუდასტურებია და არც უარუყვია, მან ხაზგასმით აღნიშნა, რომ კიევის სამხედრო დახმარება პოლონეთის ინტერესებში რჩება.

• "კვლავ მივმართავ ყველას, პრეზიდენტიდან დაწყებული და ყველა პოლიტიკოსით დამთავრებული: ნუ ეთამაშებით ცეცხლს. რუსეთთან ომში უკრაინისადმი პოლონეთის დახმარება ჩვენი პოლიტიკური და ეროვნული კონსენსუსის საგანი იყო," - განაცხადა პრემიერ-მინისტრმა.

სტრიქონებს შორის: ტუსკმა განმარტა, რომ ისტორიული კონფლიქტებისა და პოლიტიკური დაძაბულობის მიუხედავად, პოლონეთი ვერ იტყვის უარს უკრაინის დახმარებაზე.

• ამ კონტექსტში მან საზოგადოებას შეახსენა, რომ პარტია "კანონი და სამართლიანობის" წინა მთავრობაც აქტიურად ეხმარებოდა უკრაინას. 
• "ჩვენ შეგვიძლია ვიმსჯელოთ ისტორიაზე, ორმხრივ ურთიერთობებზე და განვიხილოთ, რა დონეზე უნდა დავეხმაროთ მიგრანტებსა და ლტოლვილებს აქ, პოლონეთში, მაგრამ არავითარ შემთხვევაში არ შეგვიძლია საფრთხის ქვეშ დავაყენოთ ჩვენი თანამშრომლობა უკრაინასთან მისი რუსული თავდასხმისგან დაცვის საქმეში. ასე იყო მაშინაც, როდესაც ჩვენმა წინამორბედებმა ომის პირველ დღეებსა და თვეებში გადაწყვიტეს უკრაინისთვის პოლონური იარაღის გადაცემა. ეს არავის გაუკრიტიკებია, მიუხედავად იმისა, რომ ოპერაცია ძალიან მასშტაბური იყო და გარკვეულ რისკებთან იყო დაკავშირებული," - თქვა ტუსკმა.

დიდი სურათი: მისივე თქმით, უკრაინის მხარდაჭერის საკითხი პოლონეთში შიდაპოლიტიკური დისკუსიების თემა ვერ იქნება.

• "ეს არ არის მხოლოდ სოლიდარობისა და წესიერების საკითხი. ეს, მარტივად რომ ვთქვათ, ჩვენი უსაფრთხოების საკითხია. უკრაინაში გაშვებული თითოეული რაკეტა, რომელიც ზუსტად ანადგურებს აგრესორის ჭურვებს, რაკეტებს, დრონებსა და თვითმფრინავებს - პოლონეთის უფრო დიდი უსაფრთხოებაა. ჩვენ არ შეგვიძლია ამის განხილვა აქ, ქვეყნის შიგნით, რაღაც უაზრო პოლიტიკური ბრძოლის კონტექსტში," - აღნიშნა პოლონეთის მთავრობის მეთაურმა.
• "მივმართავ ყველას, ვისაც უკრაინის დახმარების შეჩერება სურს: თქვენ რუსეთის მხარეს ხომ არ დამდგარხართ?" - იკითხა ტუსკმა და გონს მოსვლისკენ მოუწოდა მათ, ვინც ამ დისკუსიას "იაფი პოპულარობისთვის" იყენებს.

კონტექსტი: პოლონეთის სეიმის ვიცე-სპიკერმა და ნაციონალისტური პარტია "კონფედერაციის" ლიდერმა კშიშტოფ ბოსაკმა შაბათს განაცხადა, რომ "მარტში, სეიმისგან მალულად, მთავრობამ უკრაინას გადასცა ძვირადღირებული და რთულად მოსაპოვებელი რაკეტეტები Patriot-ის სისტემისთვის."

• ამის საპასუხოდ, პოლონეთის თავდაცვის მინისტრმა ვლადისლავ კოსინიაკ-კამიშმა განაცხადა, რომ გასცა განკარგულება უკრაინისთვის რუსეთის სრულმასშტაბიანი შეჭრის შემდეგ გაწეული სამხედრო დახმარების გასაჯაროვების შესახებ.