ახალი ამბები

21 აპრილს აშშ-ის პრეზიდენტმა ჯო ბაიდენმა განაცხადა, რომ უკრაინა 800 მილიონი აშშ დოლარის სამხედრო დახმარების ახალ პაკეტს მიიღებს.

პენტაგონის სპიკერმა ჯონ კირბიმ ისაუბრა, თუ რა შეიარაღებას მოიცავს ახალი პაკეტი.

დახმარების ახალ პარტიაში შედის:  

• 72 155 მმ-იანი ჰაუბიცა და მათთვის 144 ათასი ჭურვი;
• 72 ტაქტიკური ავტომობილი ამ ჰაუბიცების ბუქსირებისთვის;
• 121-ზე მეტი Phoenix Ghost ტაქტიკური უპილოტო საფრენი აპარატი;
• საველე აღჭურვილობა და სათადარიგო ნაწილები.

"ეს აქტივები, 13 აპრილს გამოცხადებულ 155 მმ-იან ჰაუბიცებთან ერთად, უზრუნველყოფს საკმარის საარტილერიო სისტემებს ხუთი ბატალიონის აღჭურვისთვის", - თქვა პენტაგონმა.

განცხადებაში აღნიშნულია, რომ 2021 წლის აგვისტოს შემდეგ პენტაგონის რეზერვიდან უკრაინისთვის გამოყოფილი მერვე სამხედრო დახმარების პაკეტია.

"აშშ-მ 4 მილიარდ დოლარზე მეტი დახმარება გაუწია უკრაინას ბაიდენის ადმინისტრაციის ხელისუფლებაში მოსვლის შემდეგ, მათ შორის დაახლოებით 3.4 მილიარდი დოლარი რუსეთის არაპროვოცირებული შემოჭრის დაწყებიდან 24 თებერვალს," - აცხადებს პენტაგონი. 

შეერთებულმა შტატებმა ასევე დაიწყო უკრაინელი სამხედროების გაწვრთნა, რათა მათ აშშ-ს მიერ მოწოდებული ჰაუბიცების გამოყენება შეძლონ.