ახალი ამბები

ამერიკის შეერთებული შტატები არასოდეს აღიარებს რუსეთის მიერ ყირიმის ანექსიას. ამის შესახებ ნათქვამია აშშ-ის სახელმწიფო დეპარტამენტის განცხადებაში, რომელიც 26 თებერვალს - ყირიმის ავტონომიური რესპუბლიკისა და ქალაქ სევასტოპოლის ოკუპაციის წინააღმდეგ ბრძოლის დღეს გამოქვეყნდა.

"ცხრა წლის წინ რუსეთი შეიჭრა უკრაინაში და დაიპყრო ყირიმი, რაც საერთაშორისო სამართლის, უკრაინის სუვერენიტეტისა და ტერიტორიული მთლიანობის აშკარა დარღვევა იყო. შეერთებული შტატები მიესალმება უკრაინული ყირიმის პლატფორმის ძალისხმევას, მიაპყროს მსოფლიოს ყურადღება რუსულ ოკუპაციაზე. აშშ არასოდეს აღიარებს რუსეთის მიერ ნახევარკუნძულის ანექსიას. ყირიმი უკრაინაა." - ნათქვამია განცხადებაში.

ზელენსკის ბრძანებულებით, 2020 წელს, 26 თებერვალი ოფიციალურად გამოცხადდა ყირიმის ავტონომიური რესპუბლიკისა და ქალაქ სევასტოპოლის ოკუპაციის წინააღმდეგ ბრძოლის დღედ.

"9 წლის წინ ყირიმში რუსული აგრესია დაიწყო. ყირიმის დაბრუნებით ჩვენ აღვადგენთ მშვიდობას. ეს ჩვენი მიწაა. ჩვენი ხალხი. Ჩვენი ისტორია. უკრაინის დროშას უკრაინის ყველა კუთხეში დავაბრუნებთ. ყირიმი თავისუფალი იქნება!" - წერს უკრაინის პრეზიდენტი ამ დღესთან დაკავშირებით.